تۇركياداعى پرەزيدەنت سايلاۋىنا 3 كۇن قالدى
«مەملەكەت» پارتياسىنىڭ ءتوراعاسى، نەگىزگى كانديداتتاردىڭ ءبىرى مۋحاررەم ينجە ۇمىتكەرلىكتەن باس تارتتى، دەپ حابارلايدى Almaty-akshamy.kz حابار 24 تەلەارناسىنا سىلتەمە جاساپ.
ول مۇنىسىن وزىنە قارسى جاسالعان ارانداتۋشىلىقتارمەن بايلانىستىرادى. مۋحاررەم ينجە سونىمەن قاتار رەجەپ تايىپ ەردوعاندى ەمەس، ونىڭ باستى باسەكەلەسى – رەسپۋبليكالىق حالىق پارتياسىنىڭ باسشىسى كەمال كىلىچداروعلۋدى قولدايتىنىن ايتىپ قالدى. تۇركيادا ساياسي دودا كۇن سايىن قىزا تۇسۋدە. ساعات ساناپ پرەزيدەنتتىككە ۇمىتكەرلەر مەن پارلامەنتتە دەپۋتات سانىن كوبەيتكىسى كەلەتىن پارتيالار ءبىر- بىرىنەن اسىپ-تۇسەتىن ۋادەلەردى ءۇيىپ توگۋدە. مەملەكەت پارتياسىنىڭ ءتوراعاسى مۋحاررەم ينجە بۇگىن كۇتپەگەن مالىمدەمە جاساپ، ۇمىتكەر بولۋدان باس تارتتى. ول ءوز شەشىمىن وعان جاسالعان ارانداتۋشىلىقپەن بايلانىستىردى.
«مەن ساياساتتا جۇرگەنىمە 40 جىلدان استى، ءبىراق وسى جىلدار ىشىندە سوڭعى 45 كۇندە بولعان دۇنيەلەر مەنى شوشىتتى. جالعان چەكتەر، جالعان بەينەلەر. مەنىڭ سۋرەتىم يزرايلدىك ەرەسەكتەر سايتتارىندا جاريالاندى. پوليسيا دا، پروكۋراتۋرا دا تەكسەرىپ جاتقان جوق. بۇل جالادان تۇرىك مەملەكەتى مەنىڭ ابىرويىمدى قورعاي الماي وتىر»، - دەيدى «مەملەكەت» پارتياسىنىڭ ءتوراعاسى مۋحاررەم ينجە.
وسىلايشا، پرەزيدەنتتىككە 3 ۇمىتكەر – قازىرگى مەملەكەت باسشىسى، ادىلەت جانە دامۋ پارتياسىنىڭ جەتەكشىسى رەجەپ تايىپ ەردوعان، ونىڭ باستى قارسىلاسى كىلىچداروعلۋ جانە اتا اليانسىنان ۇمىتكەر سينان وگان قالدى. ال الدىن الا جاسالعان ساۋالنامالارعا سايكەس، 2 نەگىزگى كانديدات بار. ولار – قازىرگى مەملەكەت باسشىسى رەجەپ تايىپ ەردوعان مەن وپپوزيسيالىق «حالىق اليانسى» پارتيالارىنىڭ ءبىرىڭعاي كانديداتى كەمال كىلىچداروعلۋ. ەلدىڭ قازىرگى پرەزيدەنتى رەجەپ تايىپ ەردوعان سايلاۋ الدىندا قارا تەڭىز تابيعي گازىن قۇرلىققا شىعارىپ، ءبىر جىل بويى تۇرعىنداردىڭ تۇرمىستا قولداناتىن كوگىلدىر وتىننىڭ اقىسىز بولاتىنىن جاريالادى. قوسىمشا گاباردا تاعى دا تابيعي گاز كەنىشىنىڭ تابىلعانىن ايتتى. وتاندىق كولىك پەن تەڭىز جانە اۋە قورعانىس ونىمدەرىمەن تانىستىردى. ال 11 مامىر كۇنى ەڭ تومەنگى مەملەكەتتىك قىزمەتكەردىڭ جالاقىسى شىلدە ايىنان باستاپ 22 مىڭ ليرا بولاتىنىن مالىمدەدى. بۇل – ءبىزدىڭ اقشاعا شاققاندا 500 مىڭ تەڭگە.
«ءبىز زەينەتكەردەن باستاپ مەملەكەتتىك قىزمەتشىلەرگە، مۇگەدەكتەردەن شەيىتتەردىڭ تۋىستارى مەن ارداگەرلەرگە دەيىن قوعامىمىزدىڭ بارلىق توپتارىن قولدادىق. ەكونوميكامىز وسكەن سايىن جاسالعان قوسىمشا قۇننان بۇكىل حالقىمىزدىڭ لايىقتى ۇلەسىن الۋىن قامتاماسىز ەتتىك. ەلىمىز باسىنان وتكەرگەن اۋىر قيىنشىلىقتارعا، تابيعي اپاتتارعا، جاھاندىق ەكونوميكالىق داعدارىستارعا جانە وڭىرىمىزدەگى قاقتىعىستارعا قاراماستان، ءبىز بۇل سەزىمتالدىقتى ساقتاپ قالدىق»، - دەيدى تۇركيا پرەزيدەنتى رەجەپ تايىپ ەردوعان.