تابيعي اپات سالدارىنان 5 775 عيمارات قيراعان
تۇركياداعى ەكى جويقىن جەر سىلكىنىسىنەن قازا تاپقاندار سانى 5434-كە جەتتى، 31 777 ادام جاراقات الدى، دەپ حابارلايدى Almaty-akshamy.kz قازاقپارات اگەنتتىگىنە سىلتەمە جاساپ.
تۇركيا ۇكىمەتى جانىنداعى توتەنشە جاعدايلاردىڭ الدىن الۋ جانە جويۋ باسقارماسى (AFAD) اپات ايماعىنداعى سوڭعى مالىمەتتەردى جاريالادى.
ۆەدومستۆونىڭ مالىمەتىنشە، تابيعي اپات سالدارىنان 5 775 عيمارات قيراعان.
ەسكە سالا كەتسەك، دۇيسەنبى، 6 اقپاندا، تۇركيانىڭ وڭتۇستىك-شىعىسىندا ماگنيتۋداسى جەتى بالدان اساتىن ەكى جەر سىلكىنىسى بولدى (جەرگىلىكتى ۋاقىت بويىنشا 04.17-دە – 7،7 بالل جانە 13.24-تە-7،6 بالل).
پرەزيدەنت رەجەپ تايىپ ەردوعان تۇركيادا اپات قۇرباندارى ءۇشىن جەتى كۇندىك جالپىۇلتتىق ازا تۇتۋ تۋرالى جاريالادى.
سونداي-اق، قازاقستاندىق قۇتقارۋشىلار گازيانتەپ قالاسىنىڭ ورتالىعىندا ىزدەۋ جۇمىستارىن باستاپ كەتكەن. تۇركياعا 41 ادامنان تۇراتىن توپ باردى، ونىڭ ىشىندە رەسپۋبليكالىق جەدەل-قۇتقارۋ جاساعىنىڭ قۇتقارۋشىلارىنان بولەك، اپاتتار مەديسيناسى ورتالىعىنىڭ قىزمەتكەرلەرى دە بار.