ەۋرازيا سيمفونيالىق وركەسترى تۇركيا ساحناسىندا ونەر كورسەتتى
سەنبى كۇنى تۇركيا رەسپۋبليكاسى مادەنيەت مينيسترلىگىنىڭ پرەزيدەنتتىك سيمفونيالىق وركەسترىنىڭ كونسەرتتىك زالىندا ەۋرازيا سيمفونيالىق وركەسترىنىڭ قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارنالعان كونسەرتى ءوتتى. شارانى قازاقستاننىڭ تۇركياداعى ەلشىلىگى ۇيىمداستىردى، دەپ حابارلايدى Almaty-akshamy.kz.
ق ر ەلشىلىگىنەن ءمالىم ەتكەندەي، كونسەرتتە قازاقستاننىڭ حالىق ءارتىسى، ەڭبەك سىڭىرگەن قايراتكەرى، قازاق ۇلتتىق ونەر ۋنيۆەرسيتەتىنىڭ رەكتورى، ەسىمى الەمگە تانىمال سكريپكاشى ايمان مۇساقوجايەۆا ونەر كورسەتتى. سونىمەن قاتار، وپەرا ءانشىسى تالعات مۇسابايەۆ، دارىندى كومپوزيتور راحات-بي ءابدىساعىن ءوز ونەرلەرىن تىڭدارمانعا پاش ەتتى. كونسەرت ديريجەرى – ايدار تورىبايەۆ.
سونداي-اق، قازاقتىڭ قارا دومبىراسىمەن حالقىمىزدىڭ ءداستۇرلى كۇيلەرىن ورىنداعان «شابىت» دومبىراشىلار وركەسترى كورەرمەندى ونەرلەرىمەن ءتانتى ەتتى. ال ەۋرازيا سيمفونيالىق وركەسترى وتاندىق جانە الەمدىك مۋزىكا كلاسسيكالارىن ورىنداپ كوپشىلىكتىڭ ىستىق ىقىلاسىنا بولەندى.
سالتاناتتى كەشكە قازاقستان رەسپۋبليكاسىنىڭ تۇركياداعى ەلشىسى ابزال ساپاربەك ۇلى، حالىقارالىق تۇركسوي ۇيىمى باس حاتشىسى دۇيسەن قاسەيىنوۆ جانە انكاراداعى ديپلوماتيالىق ميسسيا باسشىلارى، ديپلوماتتار، تۇركيا مەملەكەتتىك ورگاندار باسشىلارى، ۋنيۆەرسيتەت وقىتۋشىلارى، زيالى قاۋىم، دياسپورا، انكارادا ءبىلىم الىپ جاتقان ستۋدەنتتەر مەن ب ا ق وكىلدەرى قاتىستى.
كونسەرتتىڭ اشىلۋ سالتاناتىندا ەلشى ابزال ساپاربەك ۇلى ءسوز سويلەدى.
«عالامعا ورتاق ءتىل – مۋزىكا مەن ونەر قاشاندا ادامداردىڭ باسىن قوسقان. وسى تۇرعىدا ونەر قازاقستان-تۇركيا قارىم-قاتىناسىنداعى باسىم باعىتتاردىڭ ءبىرى بولىپ تابىلادى. شىندىعىندا، ءبىزدىڭ حالىقتارىمىز ەجەلدەن ورتاق قۇندىلىقتاردى بىرىكتىرىپ كەلەدى. قازاقتىڭ ۇلتتىق مۋزىكالىق اسپابى دومبىرانىڭ تۇركيادا ەرەكشە ىقىلاسپەن تىڭدالۋى باۋىرلاستىعىمىزدى ودان ءارى نىعايتۋدa»، - دەدى ول.