ۇلتتىق قۇندىلىق دارىپتەلدى
الماتىدا زاماناۋي ونەر كەڭىستىگى Jauhar ۇلتتىق مۋزىكا جوباسىن كوپشىلىككە تانىستىردى، دەپ حابارلايدى Almaty-akshamy.kz
Jauhar جوباسىنىڭ ماقساتى - ۇلتتىق مۋزىكانىڭ تۇراقتى زاماناۋي پلاتفورماسىن قالىپتاستىرىپ، ءداستۇرلى ان-كۇي مەكتەپتەرىن جاستار اراسىندا كەڭ تاراتۋ. جوبا اياسىندا ەلىمىزدىڭ ۇلتتىق مۋزىكا مەكتەپتەرىن تولىعىمەن قامتۋ جوسپارلانعان. Jauharدىڭ العاشقى كەزەڭىندە ماڭعىستاۋ جىرشىلىق مەكتەبىنىڭ وكىلدەرىن ناسيحاتتاۋ كوزدەلدى. وسى رەتتە جوباعا اماندىق كومەك ۇلى، ۇزاقباي ساحييەۆ، جەتكىزگەن سەيىتوۆ، احمەت بايەكەشوۆ، ارعىن بيسەن ۇلى، امانبەك ساۋىربايەۆ، وڭداسىن قالقان، وسپان قۇلسىماقوۆ، ريزابەك سەرىك، باقداۋلەت تولىبەك ۇلى سەكىلدى 10 جىرشى قاتىسىپ، ابىل، اقتان، قاشاعان، نۇرىم، ارالباي ت.ب اقىن-جىراۋلاردىڭ شىعارمالارى ورىندالدى.
«ۇلتتىق ونەرىمىزدىڭ قاينار بۇلاعى – ءداستۇرلى ان-كۇي مەكتەپتەرىندە جاتىر. وسى رۋحاني بايلىعىمىزدى قازىرگى زاماندىق مەديا مۇمكىندىكتەرىنە يكەمدەپ، زاماناۋي دىبىس جانە ۆيدەوتۇسىرىلىم ۇيىمداستىردىق، بۇل جۇمىسقا وتاندىق ۇزدىك مامانداردى تارتتىق. بۇل ساپالى كونتەنت جاس بۋىننىڭ ۇلتتىق مۋزىكاعا دەگەن وڭ كوزقاراسىن قالىپتاستىرادى دەپ سەنەمىز»، - دەدى جوبا پروديۋسەرى توعجان قۇرمانجان قىزى.
Jauhar جوباسىنىڭ العاشقى ماۋسىمى 10 ەپيزودتان تۇرادى. ءار ەپيزود ءبىر جىرشىنىڭ شىعارماشىلىعىن قامتيدى، حرونومەتراجى 35-40 مينۋت. جىل اياعىنا دەيىن بارلىق مۋزىكالىق ستريمينگتىك پلاتفورمالاردا 10 مۋزىكالىق البوم جاريالانىپ، تەگىن تىڭداۋ مۇمكىندىگى قوسا بەرىلمەك.
تۇساۋكەسەر راسىمىندە ÖzgeEpic زاماناۋي ونەر كەڭىستىگىنىڭ ۇيىمداستىرۋشىسى ماقپال جۇماباي: «ۇلتتىق مۋزىكامىزدىڭ تۇراقتى پلاتفورماسىن قالىپتاستىرۋ ارقىلى ءبىز ءوز دەڭگەيىمىزدە ونەرىمىزدىڭ تۇرلەنۋىنە، دامۋىنا جول اشپاقپىز. حالىقتىڭ رۋحاني مۇراسى سيفرلى الەمدە مول قورىن جاساقتاپ، ءوز ورنىن يەلەنگەندە عانا بولاشاققا باتىل كوش تۇزەيدى. سوندىقتان دا جىلدارعا سوزىلاتىن بۇل جوبامىز جىرشىلىق، كۇيشىلىك مەكتەپتەردىڭ جاس تىڭدارمانىن ارتتىرىپ، سونى سەرپىن بەرەرىنە سەنىمدىمىز»، - دەدى.
Jauhar ۇلتتىق مۋزىكا جوباسى 27 قاراشادان باستاپ Youtube پلاتفورماسىنداعى Jauhar live كانالىندا ۇسىنىلادى.
ÖzgeEpic ونەر كەڭىستىگى بۇعان دەيىن زاماناۋي قازاق مۋزىكاسىن دامىتۋعا باعىتتالعان Jangyryq جوباسىن جارىققا شىعاردى.