شارا اياسىندا قازاق كوشىنىڭ 70 جىلدىعىنا وراي، «ۇلى كوش» تاقىرىبىندا فوتوسۋرەتتەر مەن ق ر جوعارى وقۋ ورىندارىنىڭ ءبىلىم كورمەسى ۇيىمداستىرىلدى
تۇركيانىڭ ىستانبۇل قالاسىنداعى باعجىلار اۋدانىندا «قازاق-تۇرىك باۋىرلاستىعى» ەسكەرتكىشى سالتاناتتى تۇردە اشىلدى، دەپ حابارلايدى Almaty-akshamy.kz وتانداستار قورىنا سىلتەمە جاساپ.
التايدان انادولىعا قونىس اۋدارعان قازاقتاردىڭ تۇركيا مەملەكەتىن مەكەندەۋىنە 70 جىل تولۋى قارساڭىندا بوي كوتەرگەن بۇل ەسكەرتكىش – ەكى ەل اراسىنداعى تۋىستىق، دوستىق قارىم-قاتىناستىڭ ايرىقشا بەلگىسى. اۆتورى – قازاقستاننىڭ ەڭبەك سىڭىرگەن قايراتكەرى، ق ر كوركەمسۋرەت اكادەمياسىنىڭ ءبىرىنشى ۆيسە-پرەزيدەنتى، بەلگىلى سۋرەتشى، رەجيسسەر، تەلەجۋرناليست جانۇزاق ءمۇساپىر.
ءىس-شارانى قازاقستاننىڭ رەسپۋبليكاسىنىڭ تۇركياداعى توتەنشە جانە وكىلەتتى ەلشىسى ەركەبۇلان ساپييەۆ سالتاناتتى تۇردە اشىپ بەردى.
باعجىلار اۋدانىنىڭ مەرى ابدۋللا وزدەمير مىرزا تۇركيادا تۇرىپ جاتقان قازاق ۇلتىنا ءوز ريزاشىلىعىن ءبىلدىرىپ، قۇتتىقتاۋىن جەتكىزدى.
قازاقستان رەسپۋبليكاسى پارلامەنتى سەناتىنىڭ دەپۋتاتى، حالىقارالىق قاتىناستار، قورعانىس جانە قاۋىپسىزدىك كوميتەتىنىڭ مۇشەسى مۇرات باقتيار ۇلى ءسوز سويلەپ، قازاق ۇلتىنىڭ قيلى تاريحىنا توقتالىپ، تۇرىك حالقىنىڭ باۋىرلاستىعىن تىلگە تيەك ەتتى.
«بىرلىك» قازاق جاستارى ۇيىمىنىڭ ءتوراعاسى اسلان سەرىك قازاقتىڭ قارا دومبىراسىمەن «قازاق وسى» ءانىن ورىنداپ، جينالعان قاۋىمنىڭ ىقىلاسىنا بولەندى.
«وتانداستار قورى» كەاق پرەزيدەنتى ابزال ساپاربەك ۇلى قازاقستان مەن تۇركيانىڭ اراقاتىناسىنا توقتالىپ، بىرلىگى بەكەم مەملەكەتتەر ەكەنىن ايتىپ ءوتتى. سونىمەن قاتار، باعجىلار اۋدانىنىڭ اكىمىنە شاپان جاۋىپ، ارنايى سىيلىق تابىستادى.
شارا اياسىندا قازاق كوشىنىڭ 70 جىلدىعىنا وراي، «ۇلى كوش» تاقىرىبىندا فوتوسۋرەتتەر مەن ق ر جوعارى وقۋ ورىندارىنىڭ ءبىلىم كورمەسى ۇيىمداستىرىلدى.