قازىرگى ۋاقىتتا ەكىباستۇز جەو-دا 4 قازاندىق جۇمىس ىستەپ تۇر
تابيعي مونوپوليالار سۋبەكتىلەرىنىڭ جىلۋ ەنەرگياسىن ءوندىرۋ جانە جىلۋ بەرۋ قىزمەتى تاريفتەرىن بەلگىلەۋ مينيسترلىكتىڭ قۇزىرەتىنە جاتپايدى، وعان تابيعي مونوپوليالار سۋبەكتىلەرىن رەتتەۋ جونىندەگى مەملەكەتتىك ورگاندار جاۋاپتى، دەپ حابارلايدى Almaty-akshamy.kz.
2022 جىلى 27 قاراشادا ەكىباستۇز جەو-دا ساعات 01.30-دا جىلۋ جەلىلەرىندەگى اقاۋلارعا بايلانىستى جەلىلىك سۋدىڭ قىسىمى تومەندەدى، سالدارىنان №11، 13، 14، 15 سۋ جىلىتۋ قازاندىقتارى اۆتوماتتى تۇردە ىستەن شىقتى، سونداي-اق №8 ەنەرگەتيكالىق قازاندىق جۇمىسى دا توقتاتىلدى.
نورماسى 400 توننا/ساعات دەلىنسە، جىلۋ جەلىسىن سۋمەن تولىقتىرۋ شامامەن 900 توننا/ساعاتتى قۇراعان.
جىلۋ جەلىلەرىندەگى جەتكىزۋ تەمپەراتۋراسى: گرافيك بويىنشا – 87 گرادۋس، ال ءىس جۇزىندە ول 51 گرادۋسقا دەيىن تومەندەپ كەتكەن.
وڭىردە بارلىق تەحنيكالىق قىزمەتتەردىڭ، ەنەرگەتيكالىق كاسىپورىندار باسشىلىعىنىڭ جانە ق ر ەنەرگەتيكا مينيسترلىگى وكىلدەرىنىڭ قاتىسۋىمەن وبلىس اكىمى باستاعان جەدەل شتاب قۇرىلدى.
«قازىرگى ۋاقىتتا ەكىباستۇز جەو-دا 4 قازاندىق جۇمىس ىستەپ تۇر، جىلۋ جەلىسى اينالىمدا. جىلۋ جەلىلەرىندەگى اقاۋلاردى جويۋعا جەدەل بريگادالار جۇمىلدىرىلدى، ورامدىق جەلىلەردە 5 اقاۋ انىقتالدى، باسقا دا زاقىمدانۋلاردى انىقتاۋ جۇمىستارى جۇزەگە اسىرىلىپ جاتىر»، - دەلىنگەن ق ر ەنەرگەتيكا مينيسترلىگىنىڭ باسپا ءسوز قىزمەتى تاراتقان مالىمەتتە.
مينيسترلىك بۇعان دەيىن پاۆلودار وبلىسى ەكىباستۇز قالاسى تۇرعىندارىنىڭ ەكىباستۇز جەو-دا جۇرگىزىلىپ جاتقان جوندەۋ جۇمىستارىنىڭ بارىسى تۋرالى شاعىمدارى بويىنشا ق ر ەنەرگەتيكا مينيسترلىگى قۇرامىندا اتومدىق جانە ەنەرگەتيكالىق قاداعالاۋ مەن باقىلاۋ كوميتەتىنىڭ جانە اكىمدىكتىڭ وكىلدەرى بار ارنايى كوميسسيا قۇرىلعانىن ەسكە سالادى.
2022 جىلعى 9-10 تامىز ارالىعىندا كوميسسيا ەكىباستۇز جەو-دا بولدى. ساپار بارىسىندا نەگىزگى جابدىقتىڭ جوندەۋ جۇمىستارى جانە تومەن تەمپەراتۋرا كەزەڭىندە جۇكتەمەنى كوتەرۋ دايىندىعى تەكسەرىلدى.
ستانسيانى ارالاۋ بارىسىندا جەو باسشىلىعىنا جوندەۋ جۇمىستارىن جەدەلدەتۋ تاپسىرىلدى. جالپى، ەلەكتر ستانسياسىندا 5 ەنەرگەتيكالىق جانە 5 سۋ جىلىتۋ قازاندىعى، سونداي-اق 1 بۋ تۋربيناسى ورناتىلعان.
«كوميسسيا جىلۋ قۇبىرلارىنىڭ توزۋىنىڭ جوعارى دەڭگەيىن ەرەكشە اتاپ ءوتتى، ول 70%-دان اسادى. جىلۋ قۇبىرلارىنىڭ قازىرگى توزۋى جىلۋ جەلىلەرىندەگى، اسىرەسە جىلىتۋ ماۋسىمدارىنىڭ باسىندا جىل سايىن بايقالاتىن جوعارى اپاتتىلىق ءقاۋپىنىڭ نەگىزگى سەبەبى بولىپ تابىلادى»، - دەلىنگەن حابارلامادا.
جىلۋ جەلىلەرى قۇبىرلارىندا جوندەۋ جۇمىستارىنىڭ قاجەتتى جانە جەتكىلىكتى كولەمىن جۇرگىزۋگە اسەر ەتەتىن نەگىزگى جۇيەلى پروبلەمالاردىڭ ءبىرى جىلۋ ەنەرگياسىنا قولدانىستاعى تومەن تاريف بولىپ تابىلادى. جىلۋ قۇبىرلارىنىڭ جالپى ۇزىندىعى - 342 شاقىرىم، جىل سايىن شامامەن 3-4 شاقىرىم جىلۋ جەلىلەرى اۋىستىرىلادى.