پرەزيدەنت سايلاۋىنا ءۇش كانديدات قاتىسادى.
تۇركيادا 14 مامىر، جەكسەنبىدە 28ء-شى شاقىرىلىمداعى پارلامەنت جانە پرەزيدەنت سايلاۋى ءوتىپ جاتىر، دەپ حابارلايدى اlmaty-akshamy.kz انادولۋعا سىلتەمە جاساپ.
سايلاۋ ۋچاسكەلەرى تاڭعى 8:00-دە اشىلىپ، جەرگىلىكتى ۋاقىت بويىنشا 17:00-دە جابىلادى.
ەلدە بارلىعى 191 885 داۋىس بەرۋ جاشىگى ورناتىلدى.
تۇركيادا جانە شەتەلدە 64،1 ميلليوننان استام سايلاۋشى داۋىس بەرەدى. 4،9 ميلليونعا جۋىق ادام ءبىرىنشى رەت داۋىس بەرىپ جاتىر.
سايلاۋشىلار جەكە باسىن كۋالاندىراتىن رەسمي قۇجاتتاردىڭ بىرىمەن داۋىس بەرە الادى.
سايلاۋشىلارعا 2 بيۋللەتەن بەرىلەدى: پرەزيدەنت پەن دەپۋتاتتار ءۇشىن. سايلاۋشىلار ەكى بولەك بيۋللەتەندى ءبىر كونۆەرتكە سالىپ، داۋىس بەرۋ جاشىگىنە سالۋى ءتيىس.
تۇركيا وسك اقپان ايىنداعى جەر سىلكىنىسىنەن زارداپ شەككەن 11 پروۆينسيادا داۋىس بەرۋ ءۇشىن قاجەتتى شارالار قابىلدادى. بۇل ايماقتاردا داۋىس بەرۋ جاشىكتەرى ارنايى كونتەينەرلەر مەن مەكتەپتەردە ورناتىلعان.
شەتەلدىك ۋچاسكەلەردە داۋىس بەرۋگە 3،4 ميلليوننان استام ادام قاتىستى. ولار ءۇشىن 73 ەلدە جانە 156 شەتەلدىك وكىلدىكتە سايلاۋ كوميسسيالارى قۇرىلدى. تۇركيانىڭ شەتەلدىك وكىلدىكتەرىندە داۋىس بەرۋ پروسەسى 9 مامىردا اياقتالدى.
تۇركياداعى پرەزيدەنت سايلاۋىنا ءۇش كانديدات قاتىسادى - قازىرگى مەملەكەت باسشىسى رەجەپ تايىپ ەردوعان، وپپوزيسيالىق حالىقتىق-رەسپۋبليكالىق پارتيانىڭ جەتەكشىسى كەمال كىلىچداروگلۋ جانە «اليانس اتا» بلوگىنىڭ كانديداتى سينان وگان.
سايلاۋعا قاتىسۋ ءۇشىن 24 ساياسي پارتيا جانە 151 تاۋەلسىز كانديدات تىركەلگەن.
ەگەر ۇمىتكەرلەردىڭ ەشقايسىسى ءبىرىنشى تۋردا ءابسوليۋتتى كوپشىلىك داۋىسقا يە بولماسا، 28 مامىردا ەكىنشى تۋر وتەدى.