تۇركيادا مۇستافا وزتۇرىك اتىنداعى ساياباق اشىلدى

ىستامبۇل ساياباعىنا مۇستافا وزتۇرىكتىڭ ەسىمى بەرىلدى.

جاڭا نىسان قازاقستان تاۋەلسىزدىگىنىڭ 30 جىلدىعىنا ورايلاستىرىلعان دۇنيەجۇزى قازاقتارىنىڭ كىشى قۇرىلتايى اياسىندا اشىلدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.

ساياباق قانداستارىمىزدىڭ ەڭ كوپ شوعىرلانعان باعجىلار اۋدانىندا ورنالاسقان.

شارا بارىسىندا قازاقستاندا جانە تۇركيادا تاەكۆوندونى دامىتقان مۇستافا وزتۇرىكتىڭ ءومىرى جايلى باياندالىپ، سپورتشىنىڭ سۇيەتىن اندەرىنەن قۇرالعان ساحنالىق قويىلىم بولدى. سونداي-اق جاس تاەكۆوندوشىلاردىڭ سپورتتىق شەبەرلىگى كورسەتىلدى.

قازاقستاننىڭ ىستامبۇلداعى باس كونسۋلى ءالىم بايەل قازاقتىڭ باتىرى تۋرالى پىكىرىن ءبىلدىردى.

«ول كىسى ەل-جۇرتىنا قىزمەت ەتۋ ءۇشىن قازاقستان ازاتتىق العاندا ەلىنە ورالعان ەدى. «مەن الەمدى كوردىم. سوسىن ەلىمدى كوردىم. نەسىن ايتايىن، ايىرماشىلىق ۇلكەن. سوندىقتان ەلىمە، جۇرتىما قىزمەت ەتۋ ءۇشىن قازاقستاندا قالدىم»، - دەگەن سوزىنەن-اق ۇلتقا دەگەن ۇلكەن ماحابباتىن بايقاۋعا بولادى.

مۇستافا وزتۇرىكتىڭ قىزى نەسليحان وزتۇرىك اكەسىنە بىلدىرىلگەن قۇرمەتكە ريزاشىلىعىن ايتتى.

«ساياباقتىڭ كىرە بەرىسىندەگى اكەمنىڭ ەسىمىن وقىعاندا كوڭىلىم بوساپ كەتتى. اكەم دە، مەن دە وسىندا تۋىپ-وستىك. ىستامبۇلداعى قازاقتاردىڭ باسىم بولىگى دە وسى جولدان وتەدى. اكەمنىڭ ەسىمى گۇنەشليدە ماڭگىلىك ساقتالاتىنىنا قاتتى قۋانىشتىمىن. ۇيىمداستىرۋشىلارعا العىسىمدى ايتامىن»، - دەدى ول.