تۇركيادا ەتنيكالىق قازاقتار باس قوستى

جيىندا قازاقستان، ەۋروپا مەن تۇركيادان جينالعان ەكى مىڭعا جۋىق قازاق باس قوستى.

التايدان باستاپ تاكلاماكان ءشولى ارقىلى گيمالاي، ءۇندىستان، پاكىستان، يراك، تۇركياعا  دەيىنگى قازاق تاريحىنداعى ۇلى كوش  1952 جىلى 13 ناۋرىزدا  تۇركيانىڭ بۇرىنعى پرەمەر-مينيسترى ادنان مەندەرەستىڭ قازاقتاردى قابىلداۋ تۋرالى شەشىمىمەن انادولى ايماعىندا توقتاعان ەدى. وسىناۋ تاريحي شەشىمنىڭ 70 جىلدىعىنا وراي تۇرىك جەرىندەگى قانداستار باس قوسىپ، كەلەلى جيىن وتكىزدى، دەپ حابارلايدى Almaty-akshamy.kz.

«وسىنداي ەرەكشە شارا ۇيىمداستىرعان قازاق باۋىرلارىمىزعا العىسىمدى بىلدىرەمىن. ىستامبۋلدىڭ زەيتىنبۇرنى، باعجىلار، كۇچۇك چەكمەجە سياقتى بىرنەشە اۋدانىندا قازاقتار تۇرادى. ولارمەن قارىم-قاتىناسىمىز وتە جاقسى. ءوزىمنىڭ دە ۋنيۆەرسيتەتتەن بەرى كەلە جاتقان قازاق دوسىم بار. الداعى ۋاقىتتا دا قازاق باۋىرلارىمىزبەن بايلانىسىمىز نىعايا بەرەتىنىنە سەنىمدىمىن»،- دەيدى  ىستامبۇل باعجىلار اۋدانىنىڭ اكىمى ابدۋللاھ وزدەمير.

«بۇل جەردەگى ماقسات ۇلكەن اتا- اپالارىمىزدى جاستارمەن تانىستىرىپ، باسىن قوسىپ، قازاقشىلىقتى ۇيرەتىپ، قازاق رۋحىن كوتەرەيىك دەپ وتىرمىز. جاس قوعامبىز. قۇرىلعانىمىزعا ءۇش جىل بولدى»، - دەدى قازاقكەنت التاي قوعامداستىعى ءتوراعا ورىنباسارى بەرەكەت چەتين.

ءان مەن كۇيدەن شاشۋ شاشىلعان جيىندا التايدان باستالعان تاريحي كوش تۋرالى كورمە كوپشىلىك نازارىن اۋداردى. مۇندا قاسىرەتتى جىلدار مەن تاعدىرلار تۋرالى سىر شەرتەتىن سيرەك سۋرەتتەر  قويىلعان.  الداعى ۋاقىتتا تۇركيادا تاريحي كوشتىڭ 70 جىلدىعىنا ارنالعان بىرنەشە جيىن ۇيىمداستىرۋ جوسپاردا بار.