تۇركيادا دەنەسى تابىلعان ادامنىڭ كىم ەكەنى بەلگىلى بولدى

قازاقستان قۇتقارۋشىلارى تۇركيادا كۇندىز-تۇنى جۇمىس ىستەپ جاتىر

تۇركيادا دەنەسى تابىلعان ادامنىڭ ءادىل قادىربەكوۆ ەكەنى انىقتالدى، دەپ حابارلايدى Almaty-akshamy.kz ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆقا سىلتەمە جاساپ.

رەسمي وكىلدىڭ حابارلاۋىنشا، 8 اقپان كۇنى كەشكىسىن حاتاي پروۆينسياسىنا قاراستى انتاكيا قالاسىندا جۇرگىزىلگەن ىزدەۋ جۇمىستارىنىڭ بارىسىندا تۇركيا ازاماتى تابىلدى. ول امان. ونى الدىمەن قۇبىلاي كەسكين ەكەن دەپ ويلاعان، الايدا كەسكيننىڭ تۋىستارى ونى راستامادى.

بۇگىن، 9 اقپان كۇنى، تاڭعى 9-دا ىزدەۋ-قۇتقارۋ جۇمىستارى جالعاسىپ، ونىڭ بارىسىندا ەكى ادامنىڭ دەنەسى تابىلدى. ونىڭ بىرەۋى تۇركيالىق قۇبىلاي كەسكين بولىپ شىقتى. ەكىنشى دەنە ءادىل قادىربەكوۆتىكى. ونى مارقۇمنىڭ تۋىستارى راستادى.

«ق ر سىرتقى ىستەر مينيسترلىگى مايىتتەردىڭ وتانىنا جەتكىزىلۋىنە بارىنشا قولداۋ كورسەتەدى. ءبىزدىڭ قۇتقارۋشىلار تۇرىك ارىپتەستەرىمەن بىرگە ءمىربولات قۇرماشيەۆتى ىزدەستىرۋ ۇستىندە»، - دەدى ايبەك سمادياروۆ.

وسىعان دەيىن تۇركيادا ءۇيىندى استىنان قازاقستان ازاماتىنىڭ دەنەسى تابىلعانىن جازدىق.

سونداي-اق تۇركياداعى جەر سىلكىنىسىنەن كەيىن حابارسىز كەتكەن سابينا مامادياروۆانىڭ امان-ەسەن تابىلعانىن حابارلادىق.

قازاقستان قۇتقارۋشىلارى تۇركيادا كۇندىز-تۇنى جۇمىس ىستەپ جاتىر.

رەسمي دەرەك بويىنشا، تۇركيادا ءزىلزالادان كوز جۇمعاندار سانى 14 مىڭنان استى، تاعى 63 مىڭ 794 ادام جارالانعان.