تۇركيادا بەنزين باعاسى تاعى قىمباتتادى

دوللار مەن مۇنايدىڭ قۇبىلۋى سالدارىنان جانارمايدىڭ ءليترى ءبىزدىڭ اقشاعا شاققاندا 680 تەڭگەدەن ساۋدالانىپ جاتىر.

ينفلياسيانىڭ ءوسۋى تۇرعىنداردىڭ قالتاسىن قاقتى. ۇكىمەت، شۇعىل ءىس-قيمىل جوسپارىن دايىندايمىز - دەپ وتىر، دەپ حابارلايدى Almaty-akshamy.kz 24.kz-كە سىلتەمە جاساپ. 

ءۇش اي بۇرىنعى ساياسي دودا الدىنداعى بەنزين 19،81، ديزەل باعاسى 18،59  ليرا بولاتىن. ال ءقازىر بەنزين 38،23 ديزەل 38،87 ليرا. ەلدە جانارماي باعاسىنىڭ سوڭعى ايلاردا قىمباتتاۋى تاسىمالعا، ال تاسىمالدىڭ قىمباتتاۋى بارلىق سالاعا اسەر ەتتى. 

حاكان ەمار، تۇرعىن: - وكىنىشكە وراي، بۇل جاعداي قالتامىزدى قاقتى. تاسىمالدىڭ وزىنە تابىسىمىزدىڭ ءبىر بولىگىن جۇمسايمىز. دوللاردىڭ دا قىمباتتاۋى، بارلىق تاۋارلاردىڭ باعاسىنىڭ وسۋىنە الىپ كەلدى. سونىڭ ىشىندە، ماشينا بولشەكتەرى بىرنەشە كۇندە 30-40% ارتقانىن كورىپ كوڭىلىمىز ءتۇستى. ءقازىر اينالاداعى تانىستارىمىزدىڭ ءبارىمىزدىڭ اڭگىمەمىز وسى بەنزين باعاسى. تۇرمىسىمىزعا تىكەلەي اسەر ەتىپ وتىر. 

ەلدە شىلدە ايىندا كوپ سالادا ەڭبەكاقى كوبەيگەنىمەن اقشانىڭ قۇنى كۇن سايىن تومەندەپ جاتىر، دەيدى تۇرعىندار. 

جافەر ەر، تۇرعىن: - بەنزيننىڭ قىمباتتاۋى ادامداردىڭ 60-70% تىكەلەي اسەر ەتەدى. مەنىڭ ەكىنشى جۇمىسىم ليفتىلەردى جوندەۋ. قالا ىشىندە كولىكپەن جۇرگەندىكتەن ءبىزدىڭ قىزمەت اقىمىز دا اۆتوماتتى تۇردە قىمباتتادى. 

تۇرىك بيلىگى، ينفلياسيامەن كۇرەستى كۇشەيتتى. قىركۇيەك ايىندا ۇكىمەت ورتا جانە قىسقا مەرزىمدى ءىس- قيمىل جوسپارىن ۇسىنباق. 

جيەۆدەت يىلماز، تۇركيا ۆيسە-پرەزيدەنتى: - ينفلياسياعا قارسى كۇرەستى تاباندى تۇردە جالعاستىرامىز.ەكىنشىدەن رەسەسسياعا ۇشىراماي، ەلىمىزدىڭ تۇراقتى دامۋىن كوزدەيمىز. 

بەنزيننىڭ قىمباتتاۋى قوعامدىق كولىك پەن تاكسي قىزمەتىنىڭ تاريفىنە دە اسەر ەتتى. ىستامبۇل مەن انكارادا اۆتوبۋستا ءجۇرۋ قۇنى ءبىزدىڭ اقشامەن ەسەپتەگەندە 255 تەڭگەدەن باستالادى.