وسىعان وراي الماتىدا مۇستافا اتاتۇرىكتى ەسكە الۋ، جاستار جانە سپورت كۇنى اتاپ ءوتىلدى
ۇگىن، 19 مامىر – تۇركيادا اتاتۇرىكتى ەسكە الۋ، جاستار جانە سپورت كۇنى. بۇل كۇن تۇركيانىڭ ازاتتىعى ءۇشىن بولعان سوعىستىڭ رەسمي باستالعان كۇنى بولىپ سانالادى. 1919 جىلى 19 مامىردا تۇركيا تاۋەلسىزدىگى ءۇشىن كۇرەسكەن ۇلتتىق قوزعالىستىڭ كوشباسشىسى مۇستافا كەمال اتاتۇرىك سامسۋنعا كەلىپ، شەتەلدىك ينتەرۆەنسياعا قارسى موبيليزاسيا جاريالادى. ول كەزدە تۇركيا مەن گرەكيا اراسىندا سوعىس بولىپ جاتقان ەدى. وسىدان 105 جىل بۇرىن «نە تاۋەلسىزدىك، نە ءولىم!» دەگەن ۇرانمەن جۇرگىزىلگەن تۇرىك ۇلتازاتتىق سوعىسىنىڭ باستالعان كۇنى رەتىندە تاريحقا ەندى. جىل سايىن 19 مامىر كۇنى تۇركيادا عانا ەمەس، الەمنىڭ تۇكپىر-تۇكپىرىندە تۇراتىن تۇرىكتەر سپورتتىق جانە مەرەكەلىك ءىس-شارالار وتكىزىپ، ۇلتتىق مەرەكە رەتىندە اتاپ وتەدى.
تۇرىك كوسەمى مۇستافا اتاتۇرىك تاۋەلسىزدىك پەن اعارتۋشىلىق الاۋىن جاققان بۇل كۇندى «جاستار جانە سپورت مەرەكەسى كۇنى» رەتىندە تۇرىك جاستارىنا سىيعا تارتىپ كەتتى.
رەسپۋبليكا سارايىنداعى مەرەكەلىك ءىس-شارادا № 1 تالعار مەكتەپ-ينتەرناتىنىڭ وقۋشىلارى، تۇركيانىڭ ستامبۋل قالاسىنداعى ايدىن دوعان اتىنداعى انادولى كاسىپتىك ليسەيىنىڭ وقۋشىلارى ونەر كورسەتتى. شارا بارىسىندا بالالار بي بيلەپ، پاتريوتتىق ولەڭدەر وقىدى. ۇلتتىق مەرەكەگە وراي كورمە ۇيىمداستىردى. 
ايتا كەتەتىن ءجايت، تۇركيا رەسپۋبليكاسىندا مۇستافا كەمال اتاتۇرىكتىڭ «ۇلت بولاشاعى بالالىق شاقتا قالانادى» دەگەن ءسوزى كەڭىنەن تانىمال.
“ازاتتىق ءۇشىن سوعىسقان قاھارماندار عازي مۇستافا كەمال اتاتۇرىكتى جانە وزگە دە شەيىتتەرىمىزدى قۇرمەتپەن، سۇيىسپەنشىلىكپەن ەسكە الامىز. ءبىزدىڭ جاستار ءوز ەلىن قازىرگى وركەنيەت دەڭگەيىنەن جوعارى، ۇلى مەملەكەت رەتىندە دارىپتەيدى.
1919 جىلى 19 مامىردا ۇلى كوسەمىمىز مۇستافا كەمالدىڭ تۇرىك ۇلتىنا سەنىم ارتىپ، سامسۋن قالاسىندا بوستاندىق پەن تاۋەلسىزدىك ءۇشىن قاسيەتتى كۇرەستى باستاعانىنا 105 جىل تولدى.
وسى تۇرعىدا ءبىز اتا-بابالارىمىزدىڭ وتانى – قازاقستانداعى ءىس-شارامىزعا قاتىسىپ، اتسالىسقان باۋىرلارىمىزعا العىسىمىزدى بىلدىرەمىز"،-دەدى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ قوناق وقىتۋشىسى رەيحان گوكبەن سالۋك.
تاقىرىپقا وراي
ەۆرەن ميۋدەرريسوگلۋ، تۇركيا رەسپۋبليكاسىنىڭ الماتىداعى باس كونسۋلى:
وسىدان تۋرا 105 جىل بۇرىن تۇركيا تاريحىندا ەڭ ماڭىزدى وقيعالاردىڭ ءبىرى بولدى. بۇل ەرەكشە داتا، ارينە. 19 مامىر –تاۋەلسىزدىك سوعىسىنىڭ باستالعان كۇنى.
وسىنداي وتە ماڭىزدى كۇندە الماتىعا تۇركيادان اتا-انام مەن قارىنداسىم كەلدى. تۇرىك حالقى ەلىنىڭ تاريحىن ەسكە الۋدا. ەلىمىزدىڭ تاۋەلسىزدىگى ءۇشىن كۇرەستىڭ باستالعانىنا 105 جىل تولۋىنا وراي كورمە ۇيىمداستىرىلدى. وندا باستالعانىنا عاسىردان استام ۋاقىت بولعان تاريحي كۇرەسكە قاتىستى قۇجاتتار مەن سۋرەتتەر قويىلدى.
تاۋەلسىزدىك ءۇشىن ۇلتتىق قوزعالىستىڭ نەگىزىن جاستار قۇراعاندىقتان، اتامىز اتاتۇرىك جاستارعا ۇنەمى سەنىم ارتتى. سوندىقتان ۇلى كوشباسشى اتامىز اتاتۇرىك تۇرىك جاستارىنا امانات ەتكەن بولاشاقتى قۇرۋدا بەرىك ىنتىماقتاستىقتا بولۋىمىز كەرەك.