تۇرىك تاياۋ شىعىس تەحنيكالىق ۋنيۆەرسيتەتىنىڭ (Orta Doğu Teknik Üniversitesi، ODTÜ، METU) عالىمدارى السگەيمەر اۋرۋىنىڭ ءقاۋپىن ەرتە انىقتاۋعا مۇمكىندىك بەرەتىن جاساندى ينتەللەكت نەگىزىندەگى تەحنولوگيانى ويلاپ تاپتى.
METU ۋنيۆەرسيتەتىنىڭ ينفورماتيكا ينستيتۋتىنىڭ پەداگوگيكالىق كەڭەسىنىڭ جانە نەيروعىلىم جانە نەيروتەحنولوگيا سالاسىنداعى بىرىككەن قولدانبالى زەرتتەۋلەر ورتالىعىنىڭ باسقارما مۇشەسى ەشيم ايدىن سوننىڭ ايتۋىنشا، ول سىلەكەيدەن الىنعان ۇلگىنى پايدالانا وتىرىپ، گەنەتيكالىق تەستىلەۋ ارقىلى جۇزەگە اسىرىلادى، دەپ حابارلايدى Almaty-akshamy.kz.
ول بۇل جاڭاشىلدىق دارىگەرلەرگە دياگنوز قويۋ كەزىندە ايتارلىقتاي كومەك كورسەتەتىنىن اتاپ ءوتتى.
«بىزگە 65 جاستان اسقان ەستە ساقتاۋ قابىلەتىنىڭ تومەندەۋى سياقتى السگەيمەر اۋرۋىنىڭ بەلگىلەرى بار ادامدار كەلەدى. ءبىز گەنەتيكالىق ساراپتاما جۇرگىزگەننەن كەيىن دارىگەرلەر ونىڭ ناتيجەسىن كلينيكالىق كورىنىسپەن بىرىكتىرىپ، سونىڭ نەگىزىندە دياگنوز قويا الادى»، - دەپ ءتۇسىندىردى ول.
ونىڭ ايتۋىنشا، زەرتتەۋ توبىنىڭ مۇشەلەرى جاساندى ينتەللەكت كومەگىمەن حالىقارالىق جۇمىس توپتارى جاساعان ءۇش اۋقىمدى دەرەكتەر جيىنتىعىن تالداۋ نەگىزىندە اۋرۋدىڭ ەرتە ساتىسىندا دامۋ ءقاۋپىنىڭ ينديكاتورى بولا الاتىن گەنەتيكالىق پروفيلدەردى انىقتايدى.
«ءبىز ازىرلەگەن ءادىس بويىنشا سىناققا قاتىسۋشىلاردان سىلەكەي ۇلگىلەرى الىنىپ، ولاردىڭ دنق-سى انىقتالادى. زەرتتەۋلەر اۋرۋدىڭ ءقاۋپىن 1،5-2 ەسە ارتتىراتىن گەنەتيكالىق وزگەرىستەردى انىقتادى. ءبىزدىڭ جوبا اياسىندا مولەكۋلالىق دياگنوستيكالىق جيناقتىڭ ءپروتوتيپى ازىرلەندى»، - دەپ جالعاستىردى ول.
بۇل ءادىس السگەيمەر اۋرۋىمەن اۋىراتىن 100 ناۋقاسقا قولدانىلدى.
عالىم السگەيمەر اۋرۋىن ەرتە دياگنوستيكالاۋدىڭ كەيىنگى ەمدەۋدە ماڭىزى زور ەكەنىن اتاپ ءوتتى.