«بۇل ەكى حالىقتىڭ باۋىرلاستىعىن كورسەتەتىن ءىس. ءبىز بۇنىمەن ماقتانامىز»، – دەدى تۇركيانىڭ الماتىداعى باس كونسۋلى الي رىزا اكىنجى شۇكىر (شۇكرۋ) گۇنايدى ماراپاتتاۋ كەزىندە. ەستەرىڭىزدە بولسا شۇكىر گۇناي ەسىمدى تۇرىك ازاماتى «اقكەنت» شاعىن اۋدانىندا بولعان ورتتە باسىن قاتەرگە تىگە وتىرىپ ءۇش بالا مەن اناسىن قۇتقارىپ قالعان ەدى.
4 تامىز، تۇستەن كەيىن تۇركيانىڭ الماتىداعى باس كونسۋلدىعى شۇكىر گۇنايدى ماراپاتتا، ونىڭ باتىلدىعى باۋىرلاس حالىقتاردىڭ دوستىعىن ايگىلەدى دەپ باعالادى. ماراپاتتاۋدان بۇرىن باس كونسۋل «اقكەنت» ىقشام اۋدانىنداعى ورتتەن قازا بولعان جانە زارداپ شەككەندەردىڭ قايعىسىنا ورتاق ەكەنىن جەتكىزدى.
باس كونسۋل الي رىزا اكىنجى سوزىندە: «ءوزىنىڭ باسىنا تونگەن قاتەرگە قاراماستان ادام ءومىرىن ساقتاپ قالۋ شىنىندا ەرلىك. تۇرىك پەن قازاق باۋىرلاستىعىنىڭ ءبىر كورىنىسى. پاندەميا كەزىندە جانە تۇركياداعى جەر سىلكىنىسى اپاتىندا دا قازاقستان مەن تۇركياداعى ازاماتتار بىر-بىرىنە شىنايى قولداۋ كورسەتتى. ءبىز تاريحىمىزبەن عانا ەمەس، شىنايى ومىردە دە باۋىرلاس ەكەنىمىزدى وسىنداي قيىنشىلىقتاردا كورسەتكەن قولداۋلارىمىز ارقىلى دالەلدەپ كەلەمىز»، – دەدى.
«مەن مۇنداي ماراپات پەن ماقتاۋ بولادى دەپ كۇتپەدىم. ءارى، سولاي بولسا ەكەن دەپ ىستەگەن جوقپىن»، – دەيدى شۇكىر گۇناي جۋرناليستەرمەن كەزدەسكەندە. ءورت كەزىندەگى ارەكەتىن تۇسىندىرگەندە: «ءبىز ءورت بولعان جەرگە جاقىن ماڭدا قۇرىلىس جۇمىستارىمەن اينالىسىپ جاتقان بولاتىنبىز. ونداعى ازاماتتارمەن بىرگە كومەككە باردىق. ءوزىمىز قۇرىلىس سالاسىندا بىلەمىز، قايسى كران قانشا بيىكتىككە جەتەتىنىن. ونداعى كران جوعارى قاباتقا جەتپەيتىن بولعاسىن، ۇستىنە ساتى جالعاپ شىقتىق. ءقاۋىپتى بولاتىنى جايلى ول كەزدە ويعا ەشتەڭە كەلمەدى. ارعى ءبىر ۇيدە بالالار بار ەكەنىن ەستىپ قاراپ تۇرا المادىم»، – دەيدى شۇكىر.
38 جاستاعى شۇكىر گۇنداي 2009 جىلدان بەرى الماتىعا كەلىپ-كەتىپ جۇمىس ىستەپ جۇرگەنىن ايتتى. ءارى تىلشىلەرگە قازاق تىلىندە جاۋاپ بەردى. «ينستراگرامدا، بارلىق جەردە ايتىپ جاتىر ەكەنى، ەرتەسىندە ءبىلدىم. ءبىراق، مەن ول ءۇشىن جاسامادىم، ءوزىمنىڭ دە ءبىر قىزىم بار»، – دەدى ءسوز سوڭىندا.
وعان بەرىلگەن ماراپات حاتىندا: « قۇرمەتتى شۇكرۇ گۇناي، 2023 جىلدىڭ 1 تامىزىندا الماتى قالاسى اقكەنت شاعىن اۋدانىندا بولعان ءورت اپاتى كەزىندە باسىڭىزدى بايگەگە تىگىپ كەيبىر قازاق باۋىرلارىمىزدىڭ ءومىرىن ساقتاپ قالعانىڭىز ءۇشىن جانە تۇرىك-قازاق باۋىرلاستىعىنا قوسقان ۇلەسىڭىز ءۇشىن العىسىمىز بەن ريزاشىلىعىمىزدى بىلدىرەمىز» دەلىنگەن.