كومەككە مۇقتاج اتا-انالار ءۇشىن جەدەل جەلى ىسكە قوسىلدى

ەلىمىزدىڭ ءىرى ساۋدا ورتالىقتارىندا مۇقتاج وتباسىلاردىڭ بالالارىنا مەكتەپكە دايىندىق بويىنشا كومەك كورسەتۋ پۋنكتتەرى اشىلدى.

ودان بولەك، اتا-انالاردىڭ ساۋالدارىنا جاۋاپ بەرەتىن جەدەل جەلى ىسكە قوسىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«مەكتەپكە جول» رەسپۋبليكالىق قايىرىمدىلىق اكسياسى 2008 جىلدان باستاپ تۇراقتى ۇيىمداستىرىلىپ كەلەدى. اتالعان كومەك از قامتىلعان، كوپبالالى وتباسىلاردىڭ بالالارى، اسىراۋشىسىنان ايىرىلعان جانە ەرەكشە بالالارعا باعىتتالعان. ودان بولەك، اتالعان ساناتتاعى بالالار جالپىعا بىردەي ءبىلىم بەرۋ قورىنان دا قارجىلاي كومەك الىپ كەلەدى»، -دەدى وقۋ-اعارتۋ ۆيسە-مينيسترى ەدىل وسپان وكق-دە وتكەن بريفينگىدە.

ونىڭ ايتۋىنشا، اتالعان قايىرىمدىلىق شارا داستۇرگە اينالدى.

«وتكەن جىلى دەمەۋشىلەر مەن مەسەناتتار 3 ملرد 781 ملن تەڭگەگە 204 مىڭنان استام وقۋشىعا كومەك كورسەتتى. بيىل قايىرىمدىلىق اكسياسى 1-30 قىركۇيەك ارالىعىندا «جاقسىلىق جاسا» ۇرانىمەن وتەدى. ازاماتتاردىڭ وتىنىشىنە نازار اۋدارۋ ماقساتىندا جەدەل جەلى ىسكە قوسىلدى. ودان بولەك، ءىرى ساۋدا ورتالىقتارىندا مۇقتاج وقۋشىلارعا گۋمانيتارلىق كومەك كورسەتۋ پۋنكتتەرى اشىلدى. بالالاردىڭ قۇقىعىن قورعاۋ كوميتەتىندە 74-25-28 جەدەل بايلانىس تەلەفونىنا حابارلاسۋعا بولادى. سونداي-اق، BALA QORǴAÝ Telegram چاتى جۇمىس ىستەيدى»، - دەيدى ول.