89-شى حالىقارالىق كىتاپحانالىق جانە اقپاراتتىق كونگرەسى (IFLA) اياسىندا 2025 جىلعى 19 تامىز كۇنى استانا قالاسىندا وتكەن قازاقستان رەسپۋبليكاسى وقۋ-اعارتۋ مينيسترلىگىنىڭ رەسپۋبليكالىق عىلىمي-پەداگوگيكالىق كىتاپحاناسىنىڭ «بالالار كىتاپحاناسى: وقۋشى – وقىرمان. وزىق وي. ادال ازامات» تاقىرىبىنداعى ءبىلىم بەرۋ ۇيىمدارىنىڭ كىتاپحاناشىلارىنا ارنالعان رەسپۋبليكالىق سەكسياسىنا تۇركيا رەسپۋبليكسى مادەنيەت جانە تۋريزم مينيسترلىگى كىتاپحانالار مەن باسىلىمدار يۋ باسقارماسىنىڭ ديرەكتورى تانەر بەيوعلى قاتىستى.
«اتاجۇرتقا اناجۇرتتان ىستىق ىقىلاسىمىزدى، سالەمىمىزدى الا كەلدىك. قازاقستاندا العاش رەت 89-شى حالىقارالىق كىتاپحانالىق جانە اقپاراتتىق كونگرەسى (IFLA) ءوتىپ جاتىر. قازاقستان وسى تاريحي وقيعانى كورەگەندىكپەن ءارى بيىك دەڭگەيدە قابىلداپ وتىر. تۇركيا بۇل كونگرەستى 1995 جىلى قابىلداعان بولاتىن. انكارادان استاناعا دەيىنگى جول – ءبىزدىڭ ءوڭىردىڭ كىتاپحانا ءىسى مەن مادەني ىنتىماقتاستىقتىڭ جاھاندىق كۇن ءتارتىبىن قالىپتاستىرۋداعى ءوسىپ كەلە جاتقان ءرولىن كورسەتەدى.
كىتاپحانالار تەك جەكە تۇلعانىڭ دامۋىنا عانا ەمەس، قوعامنىڭ زياتكەرلىك جانە مادەني بولمىسىنىڭ قالىپتاسۋىنا دا شەشۋشى ىقپال ەتەدى.
تۇركيانىڭ تۇكپىر-تۇكپىرىندە ءبىز ءارتۇرلى دامۋ كەزەڭدەرىنە بەيىمدەلگەن بوبەك جانە بالالار كىتاپحانالارىن قۇرىپ جاتىرمىز. 0–3 جاسقا ارنالعان كىتاپ بۇرىشتارىنان باستاپ، 4–6 جاسقا ارنالعان شىعارماشىلىق ايماقتارعا جانە 7–14 جاس ارالىعىنداعى بالالارعا ارنالعان وقۋ مەن ءبىلىم كەڭىستىكتەرىنە دەيىن بۇل كىتاپحانالار بالالاردىڭ كىتاپپەن تەرەڭ، قۋانىشتى ءارى بەرىك بايلانىس ورناتۋىنا جاعداي جاسايدى.
ەرتەگى ساعاتتارى، شىعارماشىلىق دراما، عىلىمي شەبەرحانالار، لوگيكالىق ويىندار جانە ينتەراكتيۆتى سيفرلىق كونتەنت ارقىلى ءبىز وقۋ تاجىريبەسىن بايىتامىز. تەحنولوگيانى كىرىكتىرۋ قيالدى، سىني ويلاۋدى جانە وزىندىك سەنىمدىلىكتى قولدايدى – بۇلار ءبىلىم قوعامىنا بەلسەندى قاتىسۋ ءۇشىن قاجەتتى داعدىلار.
بالانىڭ كىتاپپەن ەرتە بايلانىسى تەك ساۋاتتىلىقتى قالىپتاستىرمايدى؛ ول ەتيكالىق جاۋاپكەرشىلىكتىڭ، تاۋەلسىز ويلاۋدىڭ جانە ازاماتتىق سانانىڭ نەگىزىن قالايدى. وسى تۇرعىدان العاندا، كىتاپحانالار تەك ءبىلىم بەرۋدە عانا ەمەس، سونداي-اق تۇلعا تاربيەسىندە دە ورتالىق ءرول اتقارادى.
باۋىرلاس ەل قازاقستانمەن تاجىريبە الماسۋعا، بىرلەسكەن جوبالاردى جۇزەگە اسىرۋعا جانە بالالارعا شىعارماشىلىق جانە شابىتتاندىراتىن وقۋ ورتاسىن قامتاماسىز ەتۋ ءۇشىن بىرگە ەڭبەك ەتۋگە دايىنبىز»،-دەدى ءوز سوزىندە بەيوعلى.
سەكسيا جۇمىسىنا قازاقستان رەسپۋبليكاسى وقۋ-اعارتۋ مينيسترلىگىنىڭ وكىلدەرى، ءبىلىم باسقارمالارىنىڭ كىتاپحانا ءىسى جونىندەگى ماماندارى، ادىستەمەلىك كابينەتتەردىڭ ادىسكەرلەرى، اۋداندىق جانە قالالىق ءبىلىم بولىمدەرىنىڭ قىزمەتكەرلەرى، اۆتوماتتاندىرىلعان اقپاراتتىق كىتاپحانا جۇيەلەرىنىڭ اۆتورلارى، باسپا قىزمەتكەرلەرى جانە رەسپۋبليكا مەكتەپ كىتاپحاناشىلارى قاتىستى.