مەملەكەت باسشىسى جاريالاعان جۇمىسشى ماماندىقتار جىلى اياسىندا تۇركىتىلدەس ەلدەر اراسىنداعى تۇڭعىش TurkicSkills كاسىبي شەبەرلىك چەمپيوناتى 2025 جىلدىڭ كۇزىندە رەسمي تۇردە تۇركى الەمىنىڭ مادەني استاناسى تانىلعان اقتاۋ قالاسىندا وتەدى.
بۇل – جۇمىسشى ماماندىقتارىنىڭ بەدەلىن ارتتىرۋعا، كاسىبي كەڭىستىك قۇرۋعا جانە تۇركىتىلدەس ەلدەردىڭ جاس ماماندارى اراسىندا تاجىريبە الماسۋدى ىنتالاندىرۋعا باعىتتالعان اۋقىمدى باستاما. چەمپيونات جاستاردىڭ الەۋەتىن اشۋعا، زاماناۋي تەحنولوگيالاردى ىلگەرىلەتۋگە جانە ۋاقىت تالابىنا ساي بىلىكتى جاڭا بۋىن كادرلارىن دايارلاۋعا ارنالعان ماڭىزدى الاڭ بولماق.
چەمپيوناتقا 16 مەن 22 جاس ارالىعىنداعى 100-دەن استام جاس مامان مەن 80-گە جۋىق جوعارى بىلىكتى ساراپشى قاتىسادى دەپ كۇتىلۋدە. قاتىسۋشى ەلدەر قاتارىندا: قازاقستان، تۇركيا، ازەربايجان، ماجارستان، وزبەكستان، قىرعىزستان، تۇرىكمەنستان جانە موڭعوليا بار.
جارىستار اقپاراتتىق تەحنولوگيالار، قۇرىلىس جانە قۇرىلىس تەحنولوگيالارى، وندىرىستىك جانە ينجەنەرلىك تەحنولوگيالار، الەۋمەتتىك جانە جەكە قىزمەتتەر سىندى 15 نەگىزگى قۇزىرەتتىلىكتى قامتيدى. اسىرەسە ءموبيلدى روبوتوتەحنيكا جانە ۇشقىشسىز ۇشۋ اپپاراتتارىن (درونداردى) باسقارۋ سياقتى بولاشاعى زور باعىتتارعا ەرەكشە كوڭىل بولىنەدى.
چەمپيوناتتى قازاقستان رەسپۋبليكاسى وقۋ-اعارتۋ مينيسترلىگى ۇيىمداستىرادى. جوبانى جۇزەگە اسىرۋشى — ق ر وم جانىنداعى «Talap» كەاق جانە ماڭعىستاۋ وبلىسىنىڭ اكىمدىگى.