ىستامبۇلدا تۇركى مەملەكەتتەرى ۇيىمىنا قاتىسۋشى ەلدەردىڭ الەۋمەتتىك ساياسات مينيسترلەرىنىڭ العاشقى كەزدەسۋى ءوتتى.
وعان قازاقستاننان ەڭبەك جانە حالىقتى الەۋمەتتىك قورعاۋ ۆيسە-مينيسترى نازگۇل ساعىندىقوۆا قاتىستى، دەپ حابارلايدى Almaty-akshamy.kz.
كەزدەسۋ حالىقارالىق وتباسى كۇنىنە ورايلاستىرىلىپ، «جاھاندانعان الەمنىڭ تاۋەكەلدەرىنە قارسى تۇرۋ: ءبىزدىڭ وتباسىمىز – ءبىزدىڭ بولاشاعىمىز» تاقىرىبىندا ءوتتى.
ءىس-شاراعا ازەربايجان، قازاقستان، قىرعىزستان، تۇركيا جانە وزبەكستاننان، سونداي-اق باقىلاۋشى ەلدەر – تۇرىكمەنستان، ۆەنگريا مەن سولتۇستىك كيپردەن تمۇ-عا قاتىسۋشى ەلدەردىڭ ءبىرىنشى باسشىلارى مەن مينيسترلەردىڭ ورىنباسارلارى قاتىستى.
دەلەگاسيا باسشىلارىن تۇركيا رەسپۋبليكاسىنىڭ پرەزيدەنتى رەجەپ تايىپ ەردوعان قابىلدادى. ول كەزدەسۋگە قاتىسۋشىلاردى الەۋمەتتىك قورعاۋ سالاسىنداعى وڭىرلىك ىنتىماقتاستىقتىڭ باستالۋىمەن قۇتتىقتاپ، بىرلەسكەن جۇمىستا تابىس تىلەدى.
ءىس-شارا بارىسىندا تمۇ-عا قاتىسۋشى ەلدەردىڭ ورتالىق مەملەكەتتىك ورگاندارىنىڭ الەۋمەتتىك ساياسات ماسەلەلەرى بويىنشا ءوزارا ءىس-قيمىل ماسەلەلەرى تالقىلاندى.
نازگۇل ساعىندىقوۆا ءوز سوزىندە ارىپتەستەرىن قازاقستاندا الەۋمەتتىك قورعاۋ سالاسىندا جۇرگىزىلىپ جاتقان رەفورمالار تۋرالى حاباردار ەتىپ، تۇركى ينتەگراسياسى تاريحىندا الەۋمەتتىك ساياسات بويىنشا ىنتىماقتاستىق جاڭا بەلەس بولاتىنىن اتاپ ءوتتى.
كەزدەسۋ قورىتىندىسى بويىنشا تمۇ ەلدەرىنىڭ وتباسى ىستەرى جانە الەۋمەتتىك ساياسات مينيسترلەرىنىڭ ءبىرىنشى كەزدەسۋىنىڭ بىرلەسكەن دەكلاراسياسىنا قول قويىلدى ءارى تمۇ حاتشىلىعى جانىنان تۇراقتى جۇمىس ىستەيتىن الەۋمەتتىك ساياسات جونىندەگى جۇمىس توبى قۇرىلدى.
ىنتىماقتاستىق شەڭبەرىندە بىرلەسكەن زەرتتەۋلەر جۇرگىزۋ جانە كەلەسىدەي باعىتتار بويىنشا تاجىريبە الماسۋ جوسپارلانۋدا: حالىقتىڭ ءال-اۋقاتىن ارتتىرۋ، حالىقتىڭ الەۋمەتتىك وسال توپتارىن قولداۋ، سونداي-اق وتباسى ينستيتۋتىن نىعايتۋ.
الەۋمەتتىك ساياسات ماسەلەلەرى بويىنشا سىندارلى ىنتىماقتاستىق باۋىرلاس تۇركى حالىقتارىنىڭ ورنىقتى دامۋىنا، «تۇركى الەمى – 2040» كوزقاراسىن ىسكە اسىرۋعا جانە تمۇ-عا مۇشە مەملەكەتتەر اراسىنداعى ينتەگراسيانى نىعايتۋعا ىقپال ەتەتىن بولادى.
تمۇ-عا قاتىسۋشى ەلدەردىڭ الەۋمەتتىك ساياسات مينيسترلەرىنىڭ ەكىنشى كەزدەسۋىن 2025 جىلى ازەربايجاندا وتكىزۋ جوسپارلانۋدا.