تۇركى مەملەكەتتەرى ۇيىمى باس حاتشىسىنىڭ ورىنباسارى، ۇيىم اتىنان كەلگەن بايقاۋشىلار ميسسياسىنىڭ باسشىسى سادي دجافاروۆ قازاقستاندا 19 ناۋرىزدا وتكەن سايلاۋدى ۇيىمداستىرۋعا قاتىستى پىكىر ءبىلدىردى، دەپ حابارلايدى almaty-akshamy.kz .
«ميسسيا مۇشەلەرى بايقاۋشى رەتىندە استانا قالاسىنداعى ءبىرقاتار ۋچاسكەدە بولدى. داۋىس بەرۋ باستالعانعا دەيىن، 17 ناۋرىزدا بىرنەشە پارتيانىڭ وكىلىمەن كەزدەسىپ، ولاردىڭ دايىندىعىمەن تانىستىق. دەلەگاسيا پارتيالاردىڭ باعدارلارماسىنا، قارجىلىندىرۋعا، مەديارەسۋرستاردا اقپارات تاراتۋعا قاتىستى مالىمەتتەردى تالقىلادى. سونىمەن قاتار، ءبىزدىڭ ميسسيا ق ر ورتالىق سايلاۋ كوميسسياسىنىڭ ءتوراعاسى نۇرلان ابدىروۆپەن دە كەزدەستى. وسى ورايدا ول سايلاۋ پروسەسىنە قاتىستى تولىق مالىمەت بەردى»، - دەدى سادي دجافاروۆ ەلورداداعى حالىقارالىق بايقاۋشىلارعا قولعابىس كورسەتۋ ورتالىعىندا وتكەن بريفينگتە.
ونىڭ ايتۋىنشا، 19 ناۋرىز كۇنى تۇركى مەملەكەتتەرى ۇيىمى وكىلدەرى تاڭەرتەڭ استانادا اشىلعان ۋچاسكەلەردە بولعان.
«ۋچاسكەلەردىڭ اشىلۋى ۇلتتىق زاڭناما تالاپتارىنا سايكەس ىسكە اسىرىلدى. جالپى، ءبىزدىڭ ميسسيا 32 سايلاۋ ۋچاسكەسىنە باردى. ءبىز ءتيىستى مونيتورينگ جۇرگىزدىك جانە ونىڭ بارىسىندا ەلەۋلى كەمشىلىكتەر بولعان جوق. اتاپ ايتقاندا، سايلاۋدى ۇيىمداستىرۋ مەن وتكىزۋ زاڭ تالاپتارى اياسىندا ءوتتى»، - دەدى سادي دجافاروۆ.