تۋريزم مينيسترلىگى مەن دۇنيەجۇزىلىك ەتنوسپورت كونفەدەراسياسى اراسىندا مەموراندۋمعا قول قويىلدى

ق ر تۋريزم جانە سپورت مينيسترلىگى باسپا ءسوز قىزمەتىنىڭ حابارلاۋىنشا، تاراپتار دۇنيەجۇزىلىك كوشپەندىلەر ويىندارىنا قاتىساتىن ەلدەردىڭ گەوگرافياسىن كەڭەيتۋ، دەمەۋشىلەردى تارتۋ، ويىنداردىڭ حالىقارالىق تەلەحابارلارىن ۇيىمداستىرۋ جانە 5ء-شى دۇنيەجۇزىلىك كوشپەندىلەر ويىندارىنىڭ قاتىسۋشىلارىن اۋەتاسىمالداۋ بويىنشا جاردەمدەسۋ جايىن ءسوز ەتتى. سونىمەن قاتار ەرمەك مارجىقپايەۆ پەن ءبىلال ەردوعان كەزدەسۋ بارىسىندا ءوزارا ىنتىماقتاستىق تۋرالى مەموراندۋمعا قول قويدى.

قازىرگى ۋاقىتتا دۇنيەجۇزىلىك ەتنوسپورت كونفەدەراسياسى – الەمدەگى سەرپىندى دامۋشى سپورتتىق ۇيىمداردىڭ ءبىرى. جاقىندا انتالياداعى 6-شى ەتنوسپورت فورۋمى ۇيىمنىڭ قازىرگى ۋاقىتتا الەمدەگى ءداستۇرلى سپورت پەن ويىنداردى دامىتۋدىڭ نەگىزگى قوزعاۋشى كۇشى ەكەنىن راستادى.

«دۇنيەجۇزىلىك ەتنوسپورت كونفەدەراسياسىن 5ء-شى دۇنيەجۇزىلىك كوشپەندىلەر ويىندارىنىڭ بىرلەسىپ ۇيىمداستىرۋشىسى مارتەبەسىن الۋىمەن قۇتتىقتايمىن. بىرلەسكەن كۇش-جىگەر ارقىلى قاتىسۋشى ەلدەردىڭ كەڭ گەوگرافياسى قامتىلا وتىرىپ، ويىندار جوعارى دەڭگەيدە وتەتىنىنە سەنىمدىمىن. 2022 جىلى يزنيك (تۇركيا) قالاسىندا ۇيىمداستىرىلعان ءتورتىنشى دۇنيەجۇزىلىك كوشپەندىلەر ويىندارى اسا جوعارى دەڭگەيدە وتكەنىن ايتقىم كەلەدى. الەمنىڭ 102 ەلىنەن 3000 استام سپورتشىنىڭ قاتىسۋى – ويىنداردىڭ اۋقىمدى بولعانىنىڭ كورسەتكىشى. بۇل ءسوزسىز دۇنيەجۇزىلىك ەتنوسپورت كونفەدەراسياسى كومانداسىنىڭ ۇلكەن ۇلەسى»، - دەپ اتاپ ءوتتى ەرمەك مارجىقپايەۆ.

سونىمەن قاتار جيىن بارىسىندا ەرمەك مارجىقپايەۆ پەن ءبىلال ەردوعان كەلەسى دۇنيەجۇزىلىك كوشپەندىلەر ويىندارىن وتكىزەتىن ەلدى انىقتاۋ ماسەلەسىن قاراستىردى. بۇل ماسەلەنى تۇركى مەملەكەتتەرى ۇيىمىنا مۇشە مەملەكەتتەردىڭ جاستار جانە سپورت مينيسترلەرى وتىرىسىنىڭ كۇن تارتىبىنە ەنگىزۋ ۇسىنىلدى.

كەزدەسۋ سوڭىندا مينيستر ويىنداردى ۇيىمداستىرۋ كوميتەتى رەسمي ءىس-شارالارعا قاتىسۋ ءۇشىن دۇنيەجۇزىلىك ەتنوسپورت كونفەدەراسياسىنىڭ دەلەگاسيانى قابىلداۋعا دايىن ەكەنىن جەتكىزدى. ال ءبىلال ەردوعان ءوز تاراپىنان 5ء-شى دۇنيەجۇزىلىك كوشپەندىلەر ويىندارىن ويداعىداي وتكىزۋگە جان-جاقتى قولداۋ كورسەتۋگە دايىن ەكەندىگىن ءبىلدىردى.