قازاقستاندا شەتەلدىكتەرىنەن الىناتىن bed tax تۋريستىك جارناسى ەنگىزىلدى.
قازاقستاندا شەتەلدىكتەرىنەن الىناتىن bed tax تۋريستىك جارناسى ەنگىزىلدى. وسىعان وراي ق ر مادەنيەت جانە سپورت مينيسترلىگى قوناق ۇيلەرگە bed tax سالىعىن سالۋ مەحانيزمىن ءتۇسىندىردى، دەپ حابارلايدى اlmaty-akshamy.kz
2022 جىلدىڭ 1 قاڭتارىنان باستاپ قازاقستاندا شەتەلدىكتەرىنەن الىناتىن bed tax تۋريستىك جارناسى ەنگىزىلدى. پاندەميادان كەيىن نارىقتى قالپىنا كەلتىرۋ ماقساتىندا وتكەن جىلى تۋريستىك جارنا نولدىك مولشەرلەمەدە بەكىتىلدى. ال بيىلدان باستاپ سالا دامۋىنىڭ وڭ سەرپىنىن ەسكەرە وتىرىپ، جارنا بويىنشا 5%-عا دەيىنگى مولشەرلەمە قولدانىلادى.
وسى نورمانى تالقىلاۋ ماقساتىندا ەلوردالىق قوناقۇيلەر جاۋاپتى مەملەكەتتىك ورگانداردىڭ، ونىڭ ىشىندە ق ر مادەنيەت جانە سپورت مينيسترلىگى، قارجى مينيسترلىگىنىڭ وكىلدەرىمەن كەزدەسكەن.
«بۇل - تۋريزم سالاسىن قارجىلاندىرۋدىڭ تاعى ءبىر كوزى. مەملەكەت باسشىلىعى، قوعام، بيزنەس وكىلدەرى ءبىزدىڭ الدىمىزعا قويعان مىندەتتەردى تولىق اقتاۋ ءۇشىن تۇراقتى قارجىلاندىرۋ قاجەت. حالىقارالىق پراكتيكادا ول ءۇشىن bed tax-تى قولدانادى. الىسقا بارماي، مۇنداي سالىم ءتۇرى كورشىلەس رەسەي مەن وزبەكستاندا دا بار»، - دەدى مادەنيەت جانە سپورت ۆيسە-مينيسترى ەرجان ەركىنبايەۆ كەزدەسۋدە.
ۆيسە-مينيستردىڭ ايتۋىنشا، ەلىمىزگە جىلدان-جىلعا سىرتتان كەلەتىن تۋريستەردىڭ سانى ءوسىپ كەلەدى، bed tax ارقىلى بيۋدجەتكە جىل سايىن كەمىندە 2،5 ملرد تەڭگە ءتۇسۋىن بولجاۋعا بولادى.
«تۋريستىك جارنادان تۇسكەن قاراجات ءتۋريزمدى ءارى قاراي دامىتۋعا جۇمساۋعا بولادى. مىسالى، اباي وبلىسى قوناق ۇيلەرى جيناعان قاراجات سول وبلىسقا جول سالۋ، تۋريستىك جەرلەردە دارەتحانالار سالۋ جالپى تۋريستىك ينفراقۇرىلىمعا، اباي وبلىسىن جارنامالاۋعا باعىتتاۋ ابدەن مۇمكىن»، - دەدى ەرجان ەركىنبايەۆ.
«تۋريستىك جارنا مولشەرلەمەلەرىن ءوڭىردىڭ ءاربىر ءماسليحاتى شەتەلدىكتەردىڭ كەلۋ ديناميكاسىنا بايلانىستى دەربەس بەلگىلەيدى، ياعني، ءبىر وبلىستىڭ اۋداندارى مەن قالالارىندا ءارتۇرلى ستاۆكالار قولدانىلۋى مۇمكىن، ءبىراق كەمىندە 1%-دى، ال ماكسيمالدى ءمانى - 5%-دان اسپاۋ ءتيىس. سونداي-اق، مولشەرلەمەلەردى ماۋسىمدىق جۇكتەمە نەگىزىندە وزگەرتۋگە بولادى»، - دەپ ءتۇسىندىردى داستان رىسپەكوۆ.
سونداي-اق، ول بۇگىنگى تاڭدا مولشەرلەمەلەر ەلىمىزدىڭ 31 قالاسى مەن اۋداندارىندا بەكىتىلگەنىن اتاپ ءوتتى. استانا جانە الماتى قالالارىندا 5% مولشەرىندە بەكىتىلگەن، ال كەيبىر وڭىرلەردە بەكىتۋ ءالى دە جالعاسىپ جاتىر.
كەزدەسۋدە قوناق ءۇي باسشىلارى تۋريستىك جارنانى ەنگىزۋ پروسەسىنىڭ تاجىريبەسىمەن ءبولىستى.
سونداي-اق شەتەلدىك تۋريستەردىڭ مۇنداي تولەمدەرگە ىقتيمال رەاكسياسى تۋرالى، شەتەلدىكتەر ءۇشىن بۇل جارنا ءبىر شىنى كوفەدەن قىمبات بولمايتىنى ايتىلدى.