پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا تۋريزم سالاسىن سيفرلاندىرۋ جانە دامىتۋ جونىندەگى شارالار قارالدى.
مەملەكەت باسشىسىنىڭ الماتىنى زاماناۋي تۋريستىك جانە مادەني ورتالىققا اينالدىرۋ جونىندەگى تاپسىرمالارىن ورىنداۋعا ەرەكشە نازار اۋدارىلدى، دەپ حابارلايدى aqshamnews.kz.
قالا اكىمى ەربولات دوسايەۆ ءوز سوزىندە قالانىڭ تۋريستىك سەرۆيستەرىنىڭ سيفرلىق پلاتفورماسىنىڭ وزەگىنە اينالاتىن SuperApp ءموبيلدى قوسىمشاسىن قۇرۋدى ۇسىندى.
«بۇل تۇرعىندارعا دا، تۋريستەرگە دە ىڭعايلىلىقتى قامتاماسىز ەتە وتىرىپ، بارلىق قالالىق قىزمەتتەرگە قول جەتكىزۋ ءۇشىن نەگىزگى سيفرلىق پلاتفورما بولادى»، — دەپ اتاپ ءوتتى ەربولات دوسايەۆ.ول SuperApp-تىڭ باسىم باعىتتارىنىڭ ءبىرى – تۋريستىك ءمودۋلدى دامىتىپ، بارلىق نەگىزگى سەرۆيستەردى ءبىرىڭعاي سيفرلىق ەكوسيستەماعا بىرىكتىرەتىنىن اتاپ ءوتتى. پايدالانۋشىلارعا مادەني جانە سپورتتىق ءىس-شارالارعا بيلەت ساتىپ الۋ، سيفرلانعان جولدار مەن تۋريستىك باعىتتار بويىنشا مارشرۋتتاردى زەرتتەپ، جوسپارلاۋ، الماتى بويىنشا تۋرلار مەن ەكسكۋرسيالاردى برونداۋ، قالانىڭ كورنەكتى جەرلەرىمەن VR-سەرۋەن جاساۋ سياقتى فۋنكسيالار قاراستىرىلعان. 2025 جىلدىڭ 1 شىلدەسىنە دەيىن قوسىمشاعا 113 مادەني جانە سپورتتىق نىسانداردى بىرىكتىرۋ جوسپارلانۋدا، بۇل دەمالىستى جوسپارلاۋعا قول جەتىمدى جانە ىڭعايلى ەتەدى.