انتاليادا «بولاشاققا ارنالعان تۇقىم» حالىقارالىق بيزنەس-فورۋمى ءوتتى. شارانى تۇركيا رەسپۋبليكاسىنىڭ تۇقىم وسىرۋشىلەر قاۋىمداستىعى ۇيىمداستىردى، دەپ حابارلايدى Almaty-akshamy.kz ق ر اۋىل شارۋاشىلىعى مينيسترلىگىنىڭ باسپا ءسوز قىزمەتىنە سىلتەمە جاساپ.
اتالعان ءىس-شاراعا ق ر اۋىل شارۋاشىلىعى ۆيسە-مينيسترى ءابىلحايىر تامابەك باستاعان قازاقستاندىق دەلەگاسيا قاتىسىپ قايتتى.
ۆيسە-مينيستر فورۋمدا قازاقستاندا تۇقىم شارۋاشىلىعىن دامىتۋ بويىنشا جۇرگىزىلىپ جاتقان جۇمىستار تۋرالى ايتىپ بەردى.
اتاپ ايتقاندا، ول تۇرىك ارىپتەستەرىنە قازاقستاندا باستاپقى تۇقىم شارۋاشىلىعىن بىرلەسىپ دامىتۋ قاجەتتىلىگى تۋرالى ايتا وتىرىپ، ەلىمىزدىڭ اگروونەركاسىپ كەشەنىنە ينۆەستيسيا سالۋعا شاقىردى.
فورۋمعا قاتىسۋشىلار ق ر ۇكىمەتى تاراپىنان بەلسەندى جۇرگىزىلىپ وتىرعان مەملەكەتتىك قولداۋ شارالارىنا قىزىعۋشىلىق تانىتتى.
پانەلدىك پىكىرتالاس قورىتىندىسى بويىنشا، قازاقستاندا تۇرىك كاسىپكەرلەرى ءۇشىن بىرلەسكەن جۇمىستىڭ پەرسپەكتيۆالى باعىتتارى رەتىندە كوكونىس ءوندىرۋ، باۋ-باقشا ءوسىرۋ، اۋىل شارۋاشىلىعى تەحنيكالارى مەن جابدىقتارىن ءوندىرۋ، جەمىستەر مەن كوكونىستەردى وڭدەۋ، قانت، كونديتەرلىك ونىمدەر ءوندىرۋ، سونداي-اق قانت قىزىلشاسىن، جەمىستەر مەن كوكونىستەردى تەرەڭ وڭدەۋ ونىمدەرىن ءوندىرۋ بولىپ كورىنەتىنى ايتىلدى.