الماتىدا تۇركىتىلدەس جۋرناليستەر قورىنىڭ ۇيىمداستىرۋىمەن قازاقستان مەن تۇركيا جۋرناليستەرىنىڭ باسقوسۋى ءوتتى، دەپ حابارلايدى Almaty-akshamy.kz
ءىس-شاراعا وتاندىق اقپارات سالاسىنىڭ وكىلدەرىمەن قاتار، تۇرىك ەلىنىڭ بىلىكتى ماماندارى قاتىستى. اتاپ ايتقاندا، بالىكەسير جۋرناليستەر وداعىنىڭ ءتوراعاسى رامازان دەمير، تۇركيا اقپارات مينيسترلىگىنىڭ ماماندارى، بۇقارالىق اقپارات قۇرالدارىنىڭ باسشىلارى ءسوز سويلەدى. حالىقارالىق جوبانى ۇيىمداستىرعان - «تۇركىتىلدەس جۋرناليستەر قورى» قق مەن دۇنيەجۇزىلىك شەتەلدىك باسپا ءسوز اسسوسياسياسى.
- ءبىزدى قۇرمەتتەپ شاقىرىپ، قوشەمەتتەپ قارسى العاندارىڭىزعا العىس بىلدىرەمىن. بىزگە الماتى قالاسىنىڭ اسەم تابيعاتى قاتتى ۇنادى. مەنىڭشە، قازاق-تۇرىك جۋرناليستەرىنىڭ اراسىندا باستالعان كاسىبي ىنتىماستىقتى بۇدان كەيىن جەرگىلىكتى باسقارۋ، اكىمدىك، مەملەكەتتىك قىزمەتكەرلەر اراسىندا جالعاستىرۋ كەرەك. تۇركيالىق، قازاقستاندىق جۋرناليستەردە كەزدەسەتىن قيىندىقتار مەن كەدەرگىلەردى اقىلداسىپ، كەڭەسىپ شەشەتىنىمىزگە سەنەمىن. ىنتىماستىق كەزىندە دە وسى ماسەلە قارالادى. يمپەرياليزمنىڭ كۇشەيگەن تۇسىندا جۋرناليستەردىڭ تەك شىندىققا نەگىزدەلگەن ناقتى اقپاراتتى بەرۋى ارقىلى مەملەكەتتى دامىتا الاتىنىنا سەنەمىز. ءبىز جۋرناليستەر باسقالاردىڭ ەمەس، حالىقتىڭ داۋىسى، ءۇنى بولۋىمىز كەرەك. اقپاراتتىق تەحنولوگيالاردىڭ دامىعان كەزەڭىندە، جاساندى ينتەللەكتتىڭ وركەندەگەن داۋىرىندە ءومىر ءسۇرىپ جاتىرمىز. سوندىقتان جۋرناليستيكانى جاڭا ۇدەرىستەرگە باعىتتاي وتىرىپ دامىتۋىمىز كەرەك، – دەيدى بالىكەسير جۋرناليستەر وداعىنىڭ ءتوراعاسى رامازان دەمير.
كەزدەسۋدە «ماسس-مەديا تۋرالى» زاڭ جوباسى اياسىنداعى ءتۇرلى ماسەلەلەر قوزعالدى. تۇركيالىق ارىپتەستەر ءوز ەلىندە وسى زاڭ اياسىندا جۋرناليستەرگە قانداي قارجىلىق كومەك كورسەتىلەتىندىگىن اتاپ ءوتتى.
– تۇركيادا جۋرناليستەرگە بارلىق جاعداي قاراستىرىلعان «ماسس-مەديا تۋرالى» زاڭ جوباسىندا ولاردىڭ قۇقىعى مەن مىندەتتەرى اشىق ءارى ناقتى جازىلعان. ينتەرنەت-پورتالدار مەن سايتتارعا قايتارىمسىز نەسيە قاراستىرىلعان. جۋرناليستەرگە پايىزسىز نەسيە بەرىلەدى. جۋرناليست قازا تاپقان نەمەسە وقىس وقيعاعا تاپ بولعان جاعدايدا، وتباسىنا قايتارىمسىز كومەك بەرىلەدى. سونىمەن قاتار، جۋرناليستەردى كاسىبي تۇرعىدا دامىتۋ ماقساتىندا سەمينارلار مەن ترەنينگتەر ۇيىمداستىرىلادى. مەملەكەت تاراپىنان جۋرناليستەرگە كورسەتىلەتىن مۇنداي كومەك قاراپايىم حالىقتىڭ ناقتى اقپاراتقا قول جەتكىزە الۋى ءۇشىن جۋرناليستەردىڭ الاڭسىز جۇمىس ىستەۋىنە مۇمكىندىك بەرۋگە جاسالادى. بۇعان دەيىن گازەتتەرگە عانا وسىنداي قارجىلىق كومەك بەرىلەتىن، كەيىن قايتا قارالىپ، زاڭعا وزگەرۋلەر ەنگىزىلدى. ەندى سايتتاعى تىلشىلەرگە دە وسىنداي كومەك كورسەتىلە باستادى. الداعى ۋاقىتتا دا جۋرناليستەرگە «ماسس-مەديا تۋرالى» زاڭ جوباسى اياسىندا كومەك كورسەتىلمەك. تۇرىك جۋرناليستەرىنىڭ شەتەل جۋرناليستەرىمەن ىنتىماقتاستىق ورناتقاندارىن قولدايمىز، - دەدى «بىرلىك» گازەتىنىڭ باسشىسى ح. ايكۋت كونيا.
بالىكەسيردەن كەلگەن جۋرناليستەر قاۋىمى باسپا ءسوز كارتاسىنىڭ ماڭىزدىلىعىنا توقتالا كەتتى. ەسكە سالايىق، ەلىمىزدەگى «ماسس-مەديا تۋرالى» زاڭ جوباسىندا دا باسپا ءسوز كارتاسى ەنگىزىلەتىندىگى تۋرالى ايتىلعان ەدى.
– ءبىزدىڭ ەلىمىزدە باسپا ءسوز كارتاسىن ارنايى كوميسسيا مۇشەلەرى بەرەدى. ونىڭ قۇرامىندا جۋرناليستەر وداعى، ۇكىمتتىك ەمەس ۇيىمدار، كاسىپوداق ۇيىمدارىنىڭ وكىلدەرى بار. ەگەر جۋرناليست شارتتارعا سايكەس كەلسە، جۋرناليست بولىپ جۇمىس ىستەگەن ءاربىر ادامعا بەرەدى. بۇدان تىلشىلەرگە ەشقانداي قىسىم كەلمەيدى. كەرىسىنشە، كارتوچكاسى بار جۋرناليستەرگە ۇشاقپەن ۇشۋعا، بايلانىس، ت.ب سالالاردا جەڭىلدىك بولادى. سونداي-اق، جۋرناليستەرگە ارنالعان ارنايى پاسپورت بەرىلەدى. بۇنىڭ كومەگىمەن اقش پەن كانادادان باسقا ەلدەرگە ۆيزاسىز بارا الادى. سىزدەر دە زاڭ جوباسىنان وسىنى تالاپ ەتە الاسىزدار. ءبىزدىڭ ەلدە مەملەكەتتىك، وپپازيزيالىق بارلىق ب ا ق وكىلدەرىنە قارجى بولىنەدى. وسىلايشا، جۋرناليستەردىڭ جۇمىس ىستەۋىنە، حالىققا شىنايى اقپارات جەتكىزىۋنە قول ۇشىمىزدى سوزامىز، – دەيدى رامازان دەمير.
باسقوسۋ اياسىندا وربىگەن ترەنينگتە الەمدىك مەدياكەڭىستىكتەگى ءباسپاسوزدىڭ ءرولى، سالالىق جۋرناليستيكانىڭ ارتىقشىلىقتارى تۋرالى ايتىلدى