قايعىنى بولىسسەڭ – ازايادى
قاسىم-جومارت توقايەۆ تۇركى مەملەكەتتەرى ۇيىمىنىڭ «اپات جانە توتەنشە جاعدايلار مەنەدجمەنتى، گۋمانيتارلىق كومەك» اتتى كەزەكتەن تىس سامميتىندە ءسوز سويلەدى، دەپ حابارلايدى Almaty-akshamy.kz.
«ءبىز باۋىرلاس تۇركياعا ۇلكەن اۋىرتپالىق اكەلگەن اسا جويقىن جەر سىلكىنىسىنە بايلانىستى جينالدىق. مىڭداعان باۋىرىمىز قازا تاپتى. مارقۇمداردىڭ تۋعان-تۋىستارىنا جانە بۇكىل تۇركيا حالقىنا تاعى دا كوڭىل ايتامىن»، - دەپ ءسوزىن تۇركياداعى ءزىلزالادان قايتىس بولعان مارقۇمداردىڭ جاقىندارىنا كوڭىل ايتۋدان باستاعان مەملەكەت باسشىسى ەلىمىز اعايىننىڭ باسىنا كۇن تۋعاندا قول قۋسىرىپ وتىرا المايتىن حالىق ەكەنىن ايتتى.
«الاپات ءزىلزالانىڭ زاردابىن تارتقان تۇرىك ەلىنىڭ قايعىسى – بارشا تۇركى جۇرتىنىڭ قاسىرەتى دەپ بىلەمىن. قازاقتا «قايعىنى بولىسسەڭ – ازايادى» دەگەن ءسوز بار. اعايىننىڭ باسىنا كۇن تۋعاندا، ءبىزدىڭ حالقىمىز ەشقاشان قول قۋسىرىپ وتىرمايدى. قازاقستان حالقى بىردەن تۇرىك باۋىرلارعا قول ۇشىن سوزدى. قۇتقارۋشىلارىمىز جانە دارىگەرلەرىمىز دەرەۋ كومەككە اتتاندى. قاجەتتى قۇرالدارمەن جابدىقتالعان ەڭ تاجىريبەلى، بىلىكتى ماماندارىمىز قۇتقارۋ جۇمىسىنا اتسالىستى. باۋىرلاس ەلگە گۋمانيتارلىق جانە قارجىلاي كومەك كورسەتىلدى»، - دەدى ق.توقايەۆ.