بۇل ماسەلە الماتى اكىمىنىڭ الاتاۋ اۋدانىنىڭ تۇرعىندارىمەن كەزدەسۋىندە كوتەرىلدى.
الماتى اكىمى ەربولات دوسايەۆ اۋدان جۇرتشىلىعىمەن كەزدەستى، دەپ حابارلايدى Almaty-akshamy.kz.
"زەردەلى" شاعىناۋدانىنداعى ماسەلەلەرگە ارنايى توقتالۋدى ءجون كورىپ وتىرمىز. وتكەن كەزدەسۋلەردە شاعىناۋدان تۇرعىندارى بالالارعا ءقاۋىپ توندىرەتىن سالىنىپ بىتپەگەن ەكى كوپ قاباتتى ۇيگە جانە ۇيلەردىڭ سەيسميكالىق كۇشەيتۋ جۇمىستارىن اياقتاۋ قاجەتتىلىگىنە قاتىستى الاڭداۋشىلىق ءبىلدىردى. تۇرعىنداردىڭ ءوتىنىشى بويىنشا وسى جىلدىڭ سوڭىنا دەيىن اۋدانداعى اپاتتى ۇيلەردى بۇزۋ تۋرالى شەشىم قابىلداندى. ولاردىڭ ورنىنا جاسىل ساياباق ايماعى مەن بالالار الاڭىن سالۋ جوسپارلانعان»، - دەدى قالا اكىمى ەربولات دوسايەۆ.
سونداي-اق، تۇرعىنداردىڭ وتىنىشتەرى بويىنشا بيىل شاعىناۋدانداعى 63 ءۇيدىڭ قاسبەتتەرى سىرلانادى. قاجەتتى قارجىلاندىرۋ ءبولىندى، مەردىگەر ۇيىم انىقتالدى. جۇمىستار تامىز ايىندا باستالىپ، اعىمداعى جىلدىڭ قاراشا ايىندا اياقتالادى.
شاعىناۋدانداعى ۇيلەردى جوندەۋ جۇمىستارى جۇرگىزىلىپ، قيراعالى تۇرعان ۇيلەر ماسەلەسى شەشىلەدى. بۇگىنگى كۇنى بارلىعى 30 ءۇيدىڭ 23ء-ى بويىنشا نىعايتۋ جۇمىستارى اياقتالدى. قالعان 7 ءۇي بويىنشا جۇمىستار اعىمداعى جىلدىڭ جەلتوقسانىنا دەيىن اياقتالادى.
سونداي-اق، تۇرعىنداردىڭ ءوتىنىشى بويىنشا بيىلعى جىلدىڭ تامىز ايىنان باستاپ مومىش ۇلى كوشەسىنىڭ قاسىنداعى جەرۇستى جاياۋ جۇرگىنشىلەر وتكەلىنىڭ ليفتىلەرىن قالپىنا كەلتىرۋ جۇمىستارى باستالادى. مەردىگەر ۇيىم انىقتالدى، جۇمىستار اعىمداعى جىلدىڭ قازان ايىندا اياقتالادى.