جەدەل شەشۋدى تالاپ ەتەتىن ماسەلە
اقتوبەدە وقۋشىنى يتتەر تالاپ ولتىرگەننەن كەيىن تۇرعىندار يت اتۋعا رۇقسات بەرۋدى سۇراپ وتىر، دەپ حابارلايدى Almaty-akshamy.kz قازاقپارات-قا سىلتەمە جاساپ.
ءقازىر اقتوبە وبلىسىندا ءيتتى اۋلاۋ جانە جويۋ جۇمىستارىمەن ءۇش توپ اينالىسىپ جاتىر. 12 جاسار ماديار شاكىراتتىڭ ولىمىنەن كەيىن بۇل جۇمىس قارقىن الا ءتۇستى. بۇگىن اقتوبەلىكتەر وقۋشى ءبىلىم العان №60 ورتا مەكتەپكە جينالىپ، ونى ءبىر مينۋت ۇنسىزدىكپەن ەسكە الدى. كەيىن قاڭعىباس يتتەرگە قاتىستى ماسەلەنى جەدەل شەشۋدى سۇرادى.
«ەسەت باتىر تۇرعىن الابىنىڭ تۇرعىنىمىن. 6 جىلدان بەرى وسى شاعىن اۋداندا تۇرامىن. ءۇش بالام №60 ورتا مەكتەپتە وقيدى. ءتۇرلى ۇيىرمەلەرگە بارادى. جالعىزباستى انامىن، بالامنىڭ ۇلكەنى 10 جاستا. تاڭنان كەشكە دەيىن بالامدى مەكتەپكە، ءتۇرلى ۇيىرمەگە تاسي المايمىن. سەبەبى بالالارىمدى اسىراۋ ءۇشىن جۇمىس ىستەۋىم كەرەك. ولاردىڭ ەركىن جۇرگەنىن قالايمىن. ءقازىر ۇيدەن شىعارا الماي وتىرمىن. قاماپ قويدىم. يتتەن قورقامىز»، - دەدى ەسەت باتىر تۇرعىن الابىنىڭ تۇرعىنى ينديرا اسىلبەك قىزى.
بۇعان دەيىن ءدال وسى تۇرعىن الابىندا قىز بالانى يت تالاعان بولاتىن. بالا ولىمنەن امان قالدى. جينالىسقا قاتىسقان اناسى التىنگۇل جارىلعاپوۆا وقيعانى بايانداپ، يت قاپقان كەزدە قىزىنىڭ ۇستىندە بولعان كيىمدى كورسەتتى. ىرىم-جىرىمى شىققان كيىمنەن-اق ءيتتىڭ قالاي تالاعانىن كورۋگە بولادى.
«2021 جىلدان بەرى وسى پروبلەمانى كورىپ كەلەمىن. قوقىستىڭ اراسىندا ۇنەمى يت جۇرەدى. اكىمدىك ماسەلەنى قولعا الۋى كەرەك ەدى. وسى ىسكە ۆەتەرينالار دا كىنالى. ولار ءيتتىڭ سانىن انىقتاپ، اتۋ ءۇشىن شارا قولدانۋى قاجەت ەدى. ءبىز دە دەر كەزىندە ايتىپ، ماسەلەنى كوتەرگەندە مۇنداي قايعىلى جاعداي بولماس پا ەدى؟ قىزىمدى يت تالادى. اكىمدىك، پروكۋراتۋراعا باردىم. ءار جەرگە جۇمسادى. ارىز جازدىم. «يت اتۋعا بولمايدى» دەگەن زاڭ شىققانىن ايتىپ وتىر. ءبارى باسىن الا قاشادى. ءيتتى ولتىردىك، اتتى دەگەن جوق. ەشكىم جاۋاپكەرشىلىكتى موينىنا العىسى كەلمەيدى. بالامنىڭ جاعدايى جاقسى دەپ ايتا المايمىن. ءتان جاراسى جازىلار، ءبىراق ىشكى دۇنيەسىن كىم ەمدەيدى؟ پسيحولوگپەن دە كەڭەستىك» ، - دەدى التىنگۇل جارىلعاپوۆا.
ايتا كەتەيىك، ماديار شاكىراتتىڭ ولىمىنە قاتىستى قىلمىستىق ءىس قوزعالىپ، تەرگەۋ ءجۇرىپ جاتىر.
ورتالىق كوممۋنيكاسيالار قىزمەتىندە بريفينگ وتكىزگەن وبلىس اكىمى وڭداسىن ورازالين كەلەسى جىلى يتتەرگە چيپ تاعىلاتىنىن ايتقان.