eGov.kz پورتالىنداعى وسى جاڭا قىزمەتتىڭ ىسكە قوسۋ ءۇشىن قازاقستان رەسپۋبليكاسىنىڭ سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى، قازاقستان رەسپۋبليكاسىنىڭ ەنەرگەتيكا مينيسترلىگى، «قازترانسگاز ايماق» اق جانە «ۇلتتىق اقپاراتتىق تەحنولوگيالار» اق بىرلەسىپ جۇمىس اتقاردى.
بۇدان بىلاي، جەكە تۇلعالار ءوز ۇيلەرىنەن شىقپاي-اق ەلەكتروندى سيفرلىق قولتاڭبانى (ەسق) قولدانىپ، eGov.kz پورتالى ارقىلى گازداندىرۋ ءۇشىن تەحنيكالىق شارتتاردى الۋعا ءوتىنىم بەرە الادى. تەحنيكالىق شارتتاردى قاراۋ جانە بەرۋ پروسەسىنە تەحنيكالىق كۇردەلى ەمەس وبەكتىلەر ءۇشىن 5 جۇمىس كۇنى جانە تەحنيكالىق كۇردەلى وبەكتىلەر ءۇشىن 10 جۇمىس كۇنى كەتەدى، دەپ حابارلايدى Almaty-akshamy.kz ەنەرگەتيكا مينيسترلىگىنە سىلتەمە جاساپ.
تۇرعىن ۇيلەر مەن وبەكتىلەردى گازداندىرۋ ءۇشىن eGov.kz پورتالىنان تەحنيكالىق جاعدايلار الۋ ءۇشىن ازاماتتار بىرنەشە قاراپايىم قادامداردان ءوتۋى كەرەك:
- eGov.kz پورتالىندا اۆتوريزاسيالانۋ؛
- بايلانىس تەلەفونى مەن ەلەكتروندىق پوشتا مەكەنجايىن كورسەتۋ؛
- تۇرۋ مەكەنجايىن تاڭداۋ؛
- گازداندىرۋ وبەكتىسىنىڭ مەكەنجايىن تاڭداۋ؛
- تەحنيكالىق ءتولقۇجات سكانەرىن قوسۋ؛
- گازداندىرۋ وبەكتىسى بويىنشا دەرەكتەردى كورسەتۋ؛
- ەسق-مەن وتىنىمگە قول قويۋ؛
- تەحنيكالىق شارتتاردىڭ بەرىلەتىنى نەمەسە بەرىلمەيتىنى تۋرالى «قازترانسگاز ايماق» اق-دان جاۋبىن كۇتۋ.
بۇل جاڭا قىزمەت ازاماتتاردىڭ ۋاقىتىن ۇنەمدەيدى، بۇرىنعىداي كەڭسەلەرگە بارۋ مەن قاعاز قۇجاتتارىن تولتىرۋدىڭ قاجەتى بولمايدى. ونلاين-سەرۆيس سونداي-اق قازاقستان رەسپۋبليكاسىنىڭ اۋماعىندا تۇرعىن ۇيلەر مەن وبەكتىلەردى گازداندىرۋدىڭ قولجەتىمدىلىگىن جاقسارتۋعا ىقپال ەتەدى.