سۋ تاسقىنىنان زارداپ شەككەن وڭىرلەردە تۇرعىن ءۇي قۇرىلىسىنىڭ بارىسىن Sergek ارقىلى باقىلاۋعا بولادى، دەپ حابارلايدى اlmaty-akshamy.kz
ق ر ونەركاسىپ جانە قۇرىلىس مينيسترلىگىنىڭ باستاماسى بويىنشا ءسدياوم، Sergek Group، «ۇات» اق جانە اكىمدىكتەرمەن بىرلەسىپ، سۋ تاسقىنىنان زارداپ شەككەندەر ءۇشىن جاڭا تۇرعىن ۇيلەر سالۋ ورىندارىندا بەينەكامەرالار ورناتىپ، بەينە اعىندارىن Sergek VMS كەشەندى بەينەباقىلاۋ جۇيەسىنە بىرىكتىرۋ جۇمىستارىن جۇرگىزدى.
«ءبىز بۇعان دەيىن gov.kz پلاتفورماسىندا سۋ تاسقىنىنا قارسى ءىس-شارالار وتكىزىلەتىن ورىنداردان ترانسلياسيا شىعاردىق. VMS كەشەندى جۇيەسىنىڭ كومەگىمەن قازاقستاندىقتار زارداپ شەككەندەر ءۇشىن سالىنىپ جاتقان تۇرعىن ءۇي قۇرىلىسىنىڭ بارىسىن باقىلاي الادى. قازاقستاندىقتاردىڭ ءومىرىن جاقسارتۋ، ولاردىڭ قاۋىپسىزدىگى مەن اقپاراتتاندىرىلۋى ءۇشىن ازىرلەگەن تەحنولوگيالاردى قولدانۋ - ءبىزدىڭ الەۋمەتتىك جاۋاپكەرشىلىگىمىز. ءبىز ەل ءۇشىن قيىن ۋاقىتتا پايدالى بولعانىمىزعا قۋانىشتىمىز. ءبىزدىڭ قىزمەتكەرلەر ءوز قۇزىرەتى شەگىندە قاجەتتى كومەك كورسەتۋ ءۇشىن تج جەدەل شتابتارىندا جانە سۋ باسقان ەلدى مەكەندەردە ەڭبەك ەتۋدە»، - دەپ Sergek Group باس ديرەكتورى اسەت احمەتوۆ ءبولىستى.
قازىرگى ۋاقىتتا قازاقستاننىڭ التى وبلىسىنداعى (اقمولا، اقتوبە، باتىس قازاقستان، قوستاناي، سولتۇستىك قازاقستان جانە اتىراۋ وبلىستارى) قۇرىلىس الاڭدارىنا 55 بەينەكامەرا ورناتىلدى. ولاردىڭ ونلاين ترانسلياسياسى gov.kz سايتىندا تاۋلىك بويى قولجەتىمدى.
«ونەركاسىپ جانە قۇرىلىس مينيسترلىگى سۋ تاسقىنىنان زارداپ شەككەن ەلدى مەكەندەردە تۇرعىن ءۇيدى قالپىنا كەلتىرۋ جۇمىستارىن باقىلاۋ جانە ۇيلەستىرۋ ءۇشىن احۋالدىق ورتالىق قۇردى. بۇگىنگى تاڭدا احۋالدىق ورتالىق زالالدى وتەۋ تۋرالى بارلىق وتىنىشتەرمەن جۇمىس ىستەپ، ءار اۋىلدا، اۋدان ورتالىعىندا جانە قالالاردا قۇرىلىس بارىسىن قاتاڭ باقىلاۋدا ۇستايدى. مينيسترلىك قىزمەتكەرلەرى وڭىرلەرگە بارىپ، قۇرىلىس ورىندارىن تەكسەرۋمەن قاتار، جەرگىلىكتى جەرلەردە ماسەلەلەردى شەشىپ، جۇمىس بارىسىن قاداعالاۋ ۇستىندە. ونلاين بەينەمونيتورينگ قۇرىلىس پەن جوندەۋ جۇمىستارىن جەدەل تارتىپپەن باقىلاۋعا جانە مەرزىمنەن ارتتا قالعان جاعدايدا تەزىرەك ارەكەت ەتۋگە مۇمكىندىك بەرەدى. اشىق جۇمىس فورماتى ءبىز ءۇشىن ماڭىزدى، ءبىز تۇرعىندارىمىزدى تۇرعىن ءۇيدى قالپىنا كەلتىرۋ بويىنشا جۇرگىزىلىپ جاتقان جۇمىستارى تۋرالى حاباردار ەتكىمىز كەلەدى»، - دەپ ءتۇسىندىردى ونەركاسىپ جانە قۇرىلىس ۆيسە-مينيسترى جاننات دۋبيروۆا.
ەستەرىڭىزگە سالا كەتەيىك، Sergek Video Management System (Sergek VMS) – بۇل قوعامدىق قاۋىپسىزدىكتى قامتاماسىز ەتۋگە نەمەسە بيزنەستى وڭتايلاندىرۋعا ارنالعان اناليتيكالىق قۇرالدارى بار كەشەندى بەينەباقىلاۋ جۇيەسى. ول قالانىڭ كوشەلەرى مەن اۋلالارىندا، قوعامدىق ورىنداردا، ءبىلىم بەرۋ مەكەمەلەرىندە، ونەركاسىپتىك نىسانداردا، سونداي-اق اۋەجايلاردا، ۆوكزالداردا جانە باسقا دا ستراتەگيالىق نىسانداردا قاۋىپسىزدىكتى قامتاماسىز ەتۋگە ارنالعان. Sergek VMS كومەگىمەن ۋاكىلەتتى قىزمەتكەرلەر ءارتۇرلى جاعدايلاردى قاداعالاپ، ۋاقتىلى ارەكەت ەتە الادى.