تۇرعىن ءۇي كەزەگىندە تۇرعان ازاماتتىڭ اتىندا جىلجىمايتىن مۇلىك بولماۋى ءتيىس

جىلجىمايتىن مۇلكى بولا تۇرا، تۇرعىن ءۇي كەزەگىنە تىركەلگەندەر بار – وتباسى بانك

تۇرعىن ءۇي كەزەگىنە تۇرعان كەيبىر قازاقستاندىقتاردىڭ جىلجىمايتىن مۇلكى بار بولىپ شىقتى. بۇل تۋرالى «وتباسى بانك» اق باسقارما ءتوراعاسى ءلاززات يبراگيموۆا ءمالىم ەتتى، دەپ حابارلايدى اlmaty-akshamy.kz.

«تۇرعىن ءۇي كەزەگىندە تۇرعان 46 ازاماتتىڭ ءوتىنىمى كەرى قايتارىلدى. سەبەبى ولاردىڭ جىلجىمايتىن مۇلكى بار. ال ەرەجە بويىنشا تۇرعىن ءۇي كەزەگىندە تۇرعان ازامات اتىندا جىلجىمايتىن مۇلىك بولماۋى ءتيىس. دەمەك، جەرگىلىكتى اكىمدىك تۇرعىن ءۇي كەزەگىندە تۇرعان ازاماتتاردى تەكسەرمەي، ءۇي كەزەگىنە قويا بەرەدى دەگەن ءسوز»، - دەدى ءلاززات يبراگيموۆا ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.

بانك باسشىسىنىڭ ايتۋىنشا، كەيبىر اكىمدىكتەر تۇرعىن ءۇي كەزەگىندە تۇرعاندارعا مونيتورينگ جۇرگىزبەيدى.

«سونىمەن قاتار 52 كليەنتتىڭ سالىق بويىنشا قارىزى بولعان. سول سياقتى 46 كليەنكە تولەم مىندەتى جۇكتەلگەن. بۇل دەگەنىمىز اتالعان ازاماتتاردىڭ باسقا بانك الدىندا قارىزى بار دەگەن ءسوز. ولار باسقا بانك ەسەپشوتىنداعى قارجىسىن مەڭگەرە المايدى. ءبىز ءقازىر بۇل ماسەلەنى شەشۋدىڭ زاڭدى جولىن قاراپ جاتىرمىز. يندۋستريا جانە ينفراقۇرىلىمدىق دامۋ مينيسترلىگى ءتيىستى زاڭنامانىڭ جوباسى ازىرلەندى. ول ءقازىر ءماجىلىستىڭ قاراۋىندا جاتىر. بۇل - قازاقستاندا العاش قولعا الىنىپ وتىرعان جوبا. ياعني مەملەكەتتەن سۋبسيديا الۋ ءۇشىن ارنايى ەسەپشوتتىڭ بولۋى. ول ەسەپشوتقا تۇسكەن قارجىنى باسقا بانك بىزگە قارىز دەپ شەشىپ الماۋى ءتيىس. ەگەر ول ازاماتتىڭ سالىق بويىنشا قارىزى بولسا دا، مەملەكەت بەرىپ تۇرعان باسقا مۇمكىندىكتى پايدالانۋعا قۇقىعى بار»، - دەيدى ول.