دۇيسەنبىدە تۋنيستىكتەر ەل پرەزيدەنتى كايس سايەد ۇسىنعان جاڭا كونستيتۋسيانى قابىلداۋعا داۋىس بەرە باستادى. وعان سايكەس، ەلدەگى اتقارۋشى بيلىك وكىلەتتىكتەرى كەڭەيىپ، زاڭ شىعارۋشى جانە سوت ورگاندارىنىڭ وكىلەتتىگى ازايادى، دەپ حابارلايدى Almaty-akshamy.kz قازاقپارات-قا سىلتەمە جاساپ.
he National News تاراتقان مالىمەت بويىنشا، داۋىس بەرۋ جەرگىلىكتى ۋاقىتپەن ساعات 06:00-دە سولتۇستىك افريكا مەملەكەتىنىڭ اۋماعىندا ورنالاسقان 11 مىڭ سايلاۋ ۋچاسكەسىندە باستالدى. پلەبيسيت 22:00-گە دەيىن جالعاسادى، سودان كەيىن سايلاۋ كوميسسياسىنىڭ مۇشەلەرى داۋىستاردى ساناۋعا كىرىسەدى. رەفەرەندۋم تۋنيس پرەزيدەنتى ك.سايەد ۇكىمەتتى وتستاۆكاعا جىبەرىپ، پارلامەنتتىڭ جۇمىسىن توقتاتقاننان كەيىن ءبىر جىل وتكەن سوڭ ءوتىپ جاتىر. وسىلايشا ول ەل بيلىگىن ءوز قولىنا الىپ وتىر.
«ءبىز تۋنيس رەسپۋبليكاسى جاريالانعان كۇنى جاڭا رەسپۋبليكا قۇرماقشىمىز»، - دەدى پرەزيدەنت رەفەرەندۋمدا داۋىس بەرگەن سوڭ.
25 شىلدە – تۋنيس رەسپۋبليكاسىنىڭ كۇنى. 1957 جىلى تۋنيس حالقى ەلدەگى مونارحيانى جويۋعا داۋىس بەرىپ، العاش رەسپۋبليكا نەگىزى قالانعان كۇن. ءتۋنيستىڭ 12 ميلليون تۇرعىنىنىڭ 9،5 ميلليونعا جۋىق ازاماتى رەفەرەندۋمعا قاتىسۋ ءۇشىن تىركەلدى، دەپ حابارلايدى AlJazeera تۋنيس سايلاۋ كوميسسياسىنىڭ (ISIE) مالىمەتتەرىنە سىلتەمە جاساپ.