ادەمى سەرىكباي الماتى قالاسىندا ءوتىپ جاتقان سەمسەرلەسۋدەن ءجاسوسپىرىم قىزدار اراسىنداعى الەم كۋبوگىنىڭ قولا جۇلدەگەرى اتاندى، دەپ حابارلايدى Almaty-akshamy.kz Inform.kz-كە سىلتەمە جاساپ.
16 جاستاعى ادەمى سەرىكباي 1/8 كەزەڭدە تۇركيالىق، ال شيرەك فينالدا وزبەكستاندىق سپورتشىنى 15:9 ەسەبىمەن ۇتتى. ال، جارتىلاي فينالدا كەيىننەن چەمپيون اتانعان وڭتۇستىك كورەيالىق كيم نا يەگە ەسە جىبەردى. بۇعان دەيىن قازاقستاندىقتار جاسوسپىرىمدەر اراسىندا الەم كۋبوگىندە جۇلدەگەرلەر قاتارىنا كىرىپ كورمەگەن. جالپى، بۇل جەكەلەي باسەكەگە 10 ەلدىڭ 50 سپورتشىسى قاتىستى.
ايتا كەتەيىك، الماتىدا ەلىمىزدە العاش رەت سەمسەرلەسۋدەن الەم كۋبوگى ءوتىپ جاتىر. جارىستىڭ رەسمي اشىلۋىنا سپورتتى دامىتۋ ديرەكسياسىنىڭ ديرەكتورى ورالباي جاقسىمبەتوۆ، قازاقستان سەمسەرلەسۋ فەدەراسياسىنىڭ پرەزيدەنتى ميربۋلات ابۋوۆ، سەمسەرلەسۋدەن مەملەكەتتىك جاتتىقتىرۋشى تيمۋر بايتاسوۆ قاتىسىپ، جينالعان سپورتشىلارعا ساتتىلىك تىلەدى.
«بۇگىن ءبارىمىز تارتىسقا، ەموسياعا تولى سپورت ءتۇرى سانالاتىن سەمسەرلەسۋدەن جاسوسپىرىمدەر اراسىنداعى الەم كۋبوگىنىڭ باستالۋىنا كۋاگەر بولىپ تۇرمىز. مۇنداي دەڭگەيدەگى جارىس ءبىزدىڭ ەلىمىزدە العاش رەت وتكەلى جاتقانىن ايتا كەتۋ كەرەك.
ءقازىر قازاقستاندا سەمسەرلەسۋ سپورتىنا دەگەن قىزىعۋشىلىق ارتىپ كەلەدى. بۇعان ۇلتتىق قۇرامامىزدىڭ الەم جانە ازيا چەمپيوناتىنداعى ايتۋلى كورسەتكىشتەرى سەرپىن بەرىپ كەلەدى. جەرلەستەرىمىز تۇراقتى تۇردە وليمپيادادا ونەر كورسەتىپ ءجۇر.
ءبىزدىڭ وسى جارىستان كۇتەرىمىز كوپ. نەگە دەسەڭىزدەر، تۋرنيردەن كەيىن كەلەسى جىلعى الەم جانە ازيا چەمپيوناتىنا قاتىساتىن ەلىمىزدىڭ جاستار قۇراماسى جاساقتالادى. اسەم قالا الماتىعا وسى تۋرنيرگە قاتىسۋ ءۇشىن 10 شاقتى ەلدىڭ جاس سپورتشىلارى جينالدى. بۇل جۇلدەگە قول جەتكىزۋ وڭاي بولمايتىنىن بايقاتادى، ياعني ناعىز بابى مەن باعى كەلىسكەندەر عانا توپ جارادى دەگەن ءسوز»، - دەدى ورالباي جاقسىمبەتوۆ.
الەم كۋبوگىنىڭ سوڭعى كۇنى كوماندالار اراسىندا ۇزدىكتەر اتىقتالادى. وندا قازاقستان، بولگاريا، تۇركيا، وڭتۇستىك كورەيا، گەرمانيا، ءۇندىستان، اۋستراليا، وزبەكستان، گونك-كونگ، گرۋزيا قىزدارى شەبەرلىك بايقاسادى.