الماتى قالالىق قوعامدىق دەنساۋلىق ساقتاۋ باسقارماسى كىمگە تۇماۋعا قارسى ەكپە تەگىن سالىناتىنىن ءمالىم ەتتى، دەپ حابارلايدى almaty-akshamy.kz
«تۇماۋعا قارسى ەكپە جىل سايىن سالىنادى. ءقازىر الماتىدا تۇماۋعا قارسى ۆاكسينا سالۋعا دايىندىق جۇمىسى جۇرگىزىلىپ جاتىر. تۇماۋ – تىنىس الۋ جولدارىنىڭ ءجىتى اۋرۋى. تۇماۋ كەزىندە باس اۋىرىپ، ادامنىڭ يممۋنيتەتى السىرەيدى»،- دەپ اتاپ ءوتتى باسقارماداعىلار.
بيىل تۇماۋعا قارسى ەكپە سالۋ 1 قازانان باستالادى. سالىناتىن «گريپپول پليۋس» ۆاكسيناسى رەسەيدە وندىرىلگەن.
«ءبىرىنشى كەزەكتە تاۋەكەل توبىنداعى تۇرعىندارعا سالىنادى. ۆاكسيناسيا باستالعانعا دەيىن ەپيدەميولوگيالىق قىزمەت ەمحانانىڭ ۋچاسكەلىك قىزمەتىمەن بىرلەسىپ، اقىسىز ەكپە جاساۋ ءۇشىن تاۋەكەل توبىنىڭ ءتىزىمىن جاسايدى. ولار: سوزىلمالى اۋرۋى بار بالالار، مەديسينا قىزمەتكەرلەرى، جۇكتى ايەلدەر، جابىق تيپتەگى مەكەمەلەردىڭ مەديسينالىق قىزمەتكەرلەرى (بالالار ءۇيى، مەكتەپ ينتەرناتى، بالالارعا/مۇگەدەكتەرگە ارنالعان مەكتەپ-ينتەرناتتارى)، قارتتار مەن مۇگەدەكتەر ۇيلەرىنىڭ كونتينگەنتى»، - دەپ اتاپ ءوتتى قالالىق دەنساۋلىق ساقتاۋ باسقارماسى.
ەكپە سالدىرار الدىندا ازامات ءوزىنىڭ ۋچاسكەلىك دارىگەرىنىڭ تەكسەرۋىنەن وتەدى، ونىڭ ينفەكسيالىق اۋرۋ جۇقتىرعاندارمەن بايلانىستا بولعان-بولماعانى جايلى سۇرايدى. دەنە قىزۋى ولشەنىپ، ەشقانداي قارسى كورسەتكىشتەر بولماسا، ۆاكسينا سالىنادى. اقىلى نەگىزدە جەكە مەديسينالىق ۇيىمداردا تۇماۋعا قارسى ۆاكسينالاۋ جۇرگىزىلەدى. ول تۇرعىنداردىڭ ءوتىنىشى بويىنشا ەرىكتى تۇردە جاسالادى.