جۇكتىلىك - ايەل ومىرىندەگى ەرەكشە كەزەڭ. بۇل كەزدە دەنساۋلىققا ەرەكشە نازار اۋدارعان ءجون.
№2 قالالىق پەريناتالدىق ورتالىقتىڭ اكۋشەر-گينەكولوگى گۇلنار كۋرەنوۆانىڭ ايتۋىنشا، جۇكتى ايەل اۋىرۋى مۇمكىن ءجىتى رەسپيراتورلىق اۋرۋلاردىڭ ءبىرى – تۇماۋ، ول جۇكتىلىك كەزىندە نارەستە دەنساۋلىعىنا جاعىمسىز اسەر ەتۋى مۇمكىن.
ماماننىڭ ايتۋىنشا، بولاشاق انا دەمىكپە نە قانت ديابەتى سياقتى سوزىلمالى اۋرۋلارمەن اۋىرسا، تۇماۋ كەزىندە ونىڭ دەنساۋلىعىنىڭ اسقىنۋ ءقاۋپى جوعارى.
تۇماۋ مەرزىمىنەن بۇرىن بوسانۋعا، گەستاسيالىق قانت ديابەتىنە، پنيەۆمونياعا، وكپەنىڭ قابىنۋىنا جانە باسقا دا اسقىنۋعا اكەلۋى مۇمكىن. سونىمەن قاتار، تۇماۋ انادان بالاعا جاتىردا بەرىلۋى مۇمكىن، بۇل ۇرىقتا قاعاناق سۋىنىڭ ازدىعى، گيپوتروفيا جانە مەرزىمىنەن بۇرىن بوسانۋ سياقتى اسقىنۋ قاۋپىنە اكەلەدى.
جاڭا تۋعان نارەستەدە تۇماۋ پنيەۆمونيا، يممۋنيتەتتىڭ تومەندەۋى سياقتى اۋىر اسقىنۋعا، ءتىپتى ولىمگە اكەلۋى مۇمكىن. بولاشاق انادا ينفەكسيانى بولدىرماۋ جانە تۇماۋدى ۋاقتىلى ەمدەۋ اۋرۋدىڭ ۇرىققا جۇقتىرۋ ءقاۋپىن تومەندەتە تۇسەدى.
تۇماۋدىڭ الدىن الۋ ادىستەرىنىڭ ءبىرى - انانىڭ دا، جاڭا تۋعان نارەستەنىڭ دە اۋرۋىن بولدىرماۋعا كومەكتەسەتىن ۆاكسيناسيا.
«تۇماۋعا قارسى ەكپە جۇكتى ايەلدى تۇماۋدان جانە ونىڭ اسقىنۋىنان قورعاۋدىڭ ءتيىمدى ادىستەردىڭ ءبىرى. ۆاكسينا انا مەن بالاعا يممۋنيتەتتى قامتاماسىز ەتەدى جانە جۇكتىلىك كەزىندە ءقاۋىپسىز بولادى. دەگەنمەن، ەكپە جاساماس بۇرىن مۇنى دارىگەرمەن تالقىلاپ، كەڭەس الۋ كەرەك»، – دەيدى گۇلنار بايبۋسىن قىزى.
دارىگەر تۇماۋدىڭ العاشقى بەلگىلەرىندە-اق دەرەۋ دارىگەرمەن كەڭەسىپ، تۇماۋدى دەر كەزىندە ەمدەۋگە كەڭەس بەرەدى، بۇل ۇرىقتىڭ اۋرۋدى جۇقتىرۋ ءقاۋپىن تومەندەتە تۇسەدى.
جۇكتى ايەل تۇماۋ ينفەكسياسىنىڭ الدىن الۋ ءۇشىن بارلىق ساقتىق شارانى قابىلداۋ كەرەك. بۇعان قولدى ۇنەمى جۋۋ، اۋرۋ ادامدارمەن جاقىن ارالاسپاۋ، بەتپەردە كيۋ، ادام كوپ جينالاتىن جەرلەردەن اۋلاق بولۋ، تازا اۋادا كوپ بولۋ جانە دۇرىس تاماقتانۋ كىرەدى.