جەڭىمپازدار 1 ميلليون تەڭگە كولەمىندەگى سىياقىعا يە بولادى
بۇگىننەن باستاپ tvtumar.kz سايتىندا «تۇمار-2023» ۇلتتىق بايگەسىنە قاتىسۋ ءۇشىن وتىنىمدەر قابىلداۋ باستالدى، دەپ حابارلايدى Almaty-akshamy.kz.
وتىنىمدەر 18 ماۋسىمعا دەيىن قابىلدانادى. بايقاۋعا 2022 جىلى قازاقستاندىق تەلەارنالاردىڭ ەفيرىنە شىققان تەليەۆيزيالىق جوبالار قاتىسا الادى. وتىنىمدەردى رەسپۋبليكالىق جانە ايماقتىق تەلەارنالار، ستۋديالار جانە كاسىبي تەليەۆيزيالىق كونتەنت شىعاراتىن كومپانيالار بەرە الادى.
بيىل العاش رەت «ۇزدىك سپورت كوممەنتاتورى» جانە «ۇزدىك جۋرناليستىك زەرتتەۋ» نوميناسيالارى بويىنشا جۋرناليستەر ءوز باعىن سىناي الادى.
نوميناسيالار:
- ۇزدىك اقپاراتتىق باعدارلاما
- ۇزدىك الەۋمەتتىك جوبا
- ۇزدىك جۋرناليستىك زەرتتەۋ
- ۇزدىك اناليتيكالىق باعدارلاما
- ۇزدىك توك-شوۋ
- ۇزدىك ويىن-ساۋىق باعدارلاماسى
- ۇزدىك تەلەجۋرناليست
- ۇزدىك تەلەجۇرگىزۋشى
- ۇزدىك سپورت كوممەنتاتورى
- ۇزدىك ايماقتىق تەلەارنا
- ۇزدىك دەرەكتى فيلم (قامال سمايىلوۆ اتىنداعى ارنايى پرەميا)
- ۇزدىك انيماسيالىق فيلم (امەن قايداروۆ اتىنداعى ارنايى پرەميا)
«تۇمار» ۇلتتىق بايگەسى تاريحىندا ەلىمىزدىڭ 1 500 استام كاسىبي جۋرناليست قاتىسۋعا ءوتىنىم بەرىپ، 258 جۇمىس نومينانتتار تىزىمىنە ەندى. بۇگىنگى كۇنى ەكسكليۋزيۆتى مۇسىنشەگە وتاندىق تەليەۆيزيالىق جۋرناليستيكانىڭ 70 مامانى يە بولىپ وتىر.
2023 جىلدىڭ جەڭىمپازدارى جىلداعى ءداستۇر بويىنشا قازاقستاندىق تەليەۆيزيانى دامىتۋعا قوسقان ۇلەسى ءۇشىن تۇمار مۇسىنشەسىنە جانە 1 ميلليون تەڭگە كولەمىندەگى سىياقىعا يە بولادى.