تۇلكىباستا جوعالعان قىز الماتىدان تابىلدى

وقيعانىڭ تولىق ءمان-جايى انىقتالۋدا.

تۇركىستان وبلىسىنىڭ پوليسەيلەرى جوعالعان ءجاسوسپىرىم قىزدى الماتىدان تاپتى، دەپ حابارلايدى Almaty-akshamy.kz Polisia.kz-كە سىلتەمە جاساپ.

تۇلكىباس اۋداندىق پوليسيا بولىمىنە جەرگىلىكتى تۇرعىن ارىزدانادى. ايەلدىڭ ايتۋىنشا، ەكى كۇن بۇرىن تۇنگى ۋاقىتتا 15 جاستاعى قىزى ۇيىنەن ەشكىمگە ەسكەرتپەستەن شىعىپ كەتىپ، وسى ۋاقىتقا دەيىن ورالماعان.

جاقىندارى وزدەرى ىزدەگەنىمەن، ەش ناتيجە شىقپاعان. اقپارات الىسىمەن، پوليسەيلەر اتالعان جايتتى تىركەپ، بىردەن ىزدەستىرۋ جۇمىستارىنا كىرىستى. تۇلكىباس اۋداندىق پوليسيا ءبولىمىنىڭ ۋچاسكەلىك پوليسيا ينسپەكتورى نۇربول ەسەنبەكوۆ ءجاسوسپىرىم قىزدىڭ تۋىستارىمەن بىرگە ىزدەۋ جۇمىستارىن جۇيەلى جۇرگىزدى. ءجاسوسپىرىمنىڭ بارۋى، حابارلاسۋى مۇمكىن دوس-جاقىندارىنان جاۋاپ الىندى. قوعامدىق كولىك پەن تاكسي جۇرگىزۋشىلەرىنەن سۇراستىرىلدى.

سونىڭ ناتيجەسىندە، 15 جاستاعى قىزدىڭ تۇنگى ۋاقىتتا تاكسيمەن شىمكەنت قالاسىنا جەتىپ، ودان كەيىن الماتى قالاسىنا كەتكەنى بەلگىلى بولدى. ياعني، پوليسەيلەر بىرنەشە ساعات ىشىندە جوعالعان قىزدىڭ جۇرگەن جەرىن انىقتادى. ول الماتى قالاسىنداعى تۋعان اپكەسىنىڭ ۇيىنە بارعان. قازىرگى تاڭدا ءتارتىپ ساقشىلارى تابىلعان قىزدى ۇيىنە جەتكىزۋمەن اينالىسۋدا.