مەملەكەت باسشىسى ق.توقايەۆتىڭ قازاقستان حالقىنا جولداۋىنىڭ نەگىزگى يدەياسى – ەلىمىزدىڭ قازىرگى سىن-قاتەرلەرگە تولى كەزەڭدەگى قيىندىقتارىن ەڭسەرىپ، قوعامىمىزداعى وزەكتى ماسەلەلەرگە قاتىستى تۇبەگەيلى، كەشەندى جاڭعىرۋدىڭ جولدارىن انىقتاۋ.
قاڭتار وقيعاسىنىڭ ساباعى حالقىمىزدىڭ جادىندا ەستەن كەتپەيتىن ءىز قالدىرعانى بەلگىلى، ەندى ونىڭ سالدارلارىمەن عانا ەمەس، سونىمەن قاتار تاريحي دەرەكتىڭ تەرەڭدە جاتقان سەبەپتەرىن ايقىنداۋىمىز قاجەت ەكەنى ايتىلدى.
«حالىق ءۇنىن ەستيتىن مەملەكەت» تۇجىرىمداماسى ءارى قاراي قوعامدى پارمەندى دەموكراتيالاندىرۋ ۇدەرىستەرى ارقىلى ايشىقتالا، دامي تۇسەتىنى بايىپتالدى. ەلىمىزدە تۇراقتى تۇردە جۇمىس اتقاراتىن ۇلتتىق قۇرىلتايدى قۇرۋ يدەياسى دا جولداۋدىڭ جاڭاشىلدىق قىرى بولىپ كەلەدى. ازاماتتاردىڭ ساياسي مادەنيەتىن قالىپتاستىرۋعا جانە ونى وركەنيەتتى سيپاتتا وربىتۋگە سايلاۋدى ءادىل جولمەن وتكىزۋ ۇلكەن ىقپالىن تيگىزەدى.
جالپى، سايلاۋ ماسەلەسىندەگى كەمشىلىكتەر پرەزيدەنت تاراپىنان اشىق ايتىلىپ، ءبىرشاما سىني تۇجىرىمدار كەلتىرىلدى. ەندى سايلاۋعا قاتىسۋدى بەلسەندەندىرۋ، جالپى، وسى سالاداعى دەموكراتيالىق كەلبەتتى ورنىقتىرۋ ءۇشىن ماجوريتارلىق سيپاتتاعى سايلاۋدىڭ ۇلەس سالماعىن 30 پايىزعا جەتكىزۋ كوزدەلەدى. دەمەك، دەپۋتاتتار كورپۋسى بىرتە-بىرتە ءوزىنىڭ ماعىنالىق سيپاتى بويىنشا بيلىكتىڭ ناعىز دەموكراتيالىق كۇشىنە اينالۋىنا ءتيىس.
جاڭادان اشىلاتىن اباي، ۇلىتاۋ، جەتىسۋ وبلىستارىنىڭ ءوزى اكىمشىلىك-ايماقتىق دەڭگەيدەگى ۇلكەن جۇمىستاردىڭ تيىمدىلىگىن ارتتىرىپ، وڭىرلىك دەڭگەيدەگى الەۋمەتتىك ماسەلەلەردى ۋاقىتىلى شەشىپ وتىرۋعا وڭدى ىقپالىن تيگىزەدى دەگەن ويمەن استاسىپ جاتىر.
سىرتقى جانە ىشكى ساياسي-الەۋمەتتىك ۇدەرىستەر ازىرگە ەلىمىزدە ۇيلەسىمدى احۋالدى قالىپتاستىرۋعا كەيبىر وزىندىك كەدەرگىلەرىن تيگىزىپ وتىر، سوندىقتان رەفورمالاردى تولىقتاي جۇزەگە اسىرۋ ءۇشىن ءاربىر قازاقستان ازاماتىنىڭ ۇلكەن جاۋاپكەرشىلىگىن ارتتىرۋ قاجەت. وتانداستارىمىزدىڭ ەڭبەكقورلىعى پەن الەۋمەتتىك ادىلەتتىلىككە بەيىمدىلىگى قوعامداعى تۇبەگەيلى وزگەرىستەردىڭ ىرگەتاسى بولاتىنىنا سەنىمدىمىز.