قازاقستان پرەزيدەنتى ق.توقايەۆتىڭ حالىققا جولداۋىندا ءبىرقاتار ماڭىزدى ماسەلەنى ورتاعا سالعانى كوپشىلىكتىڭ كوكەيىنەن شىقتى. اسىرەسە، كوپتەن بەرى كوكەيدە جۇرگەن، ءبىر كەزدەرى جابىلىپ قالعان وبلىستاردى مەملەكەت باسشىسى قايتا اشۋ تۋرالى ايتقانى جۇرەكجاردى جاڭالىق بولدى.
قازاقستان پارلامەنتىنىڭ بىرلەسكەن وتىرىسىنداعى جولداۋدا كوتەرىلگەن جايتتاردى جۇرتشىلىق قىزۋ قولداپ، ءبىراۋىزدان قۋاتتاعانى بايقالادى. جاڭا داۋىردە جاڭا قازاقستان قۇرۋ باستاماسى مىنا ماسەلەلەردەن كورىنىس تاپتى.
ايتالىق، ورتالىعى سەمەي قالاسى بولاتىن اباي وبلىسى، ورتالىعى جەزقازعان شاھارى بولاتىن ۇلىتاۋ وبلىسى، ورتالىعى تالدىقورعان قالاسى بولاتىن جەتىسۋ وبلىسى مەن ورتالىعى قاپشاعاي قالاسى اتانعان الماتى وبلىسى بارشا جۇرتقا قۇت-بەرەكە اكەلسىن دەپ تىلەيىك. بولاشاقتا قاپشاعاي شاھارىنىڭ اتاۋى قونايەۆقا اۋىساتىندىعى پرەزيدەنت جولداۋىندا ايقىن كورىنىس تاپتى.
ەندىگى ءبىر كوكەيتەستى ماسەلە، بۇرىن جابىلىپ قالعان كەي اۋدانداردى قايتا قالپىنا كەلتىرۋگە باسشىلىق تاراپىنان نازار اۋدارىلسا. ايتالىق، ءبىر كەزدەرى وبلىس بويىنشا شەكارالىق اۋدانداردى قايتا اشۋ تۋرالى شەشىم قابىلدانسا ءتىپتى ورىندى بولار ەدى.
بۇل كۇنگى جولداۋدا ەل دامۋىنا قاتىستى جۇرتشىلىق كۇتكەن ءبىرقاتار جايتتەر ورتاعا سالىندى. سولاردىڭ قاتارىندا جوعارىدا ايتىلعان، جاڭادان بوي كوتەرگەن وبلىستاردىڭ اشىلۋى قازاقستان جۇرتشىلىعى تاراپىنان قىزۋ قولداۋ تاۋىپ، بولاشاقتا ەل دامۋىنا، جاڭا قازاقستاننىڭ وركەن جايۋىنا زور سەپتىگىن تيگىزەدى دەپ ۇمىتتەنەمىز.