تروللەيبۋستا دا سپورتپەن شۇعىلدانۋعا بولادى

الماتىداعى تروللەيبۋس پاركى قوعامدىق كولىكتە سپورتپەن شۇعىلدانعان جۇرگىزۋشىگە فيتنەس-ورتالىققا ابونومەنت سىيلادى، دەپ حابارلايدى almaty-akshamy.kz «حابار 24» سىلتەمە جاساپ.

پارك باسشىلىعى 55 جاستاعى اسحات يبرايەۆقا الەۋمەتتىك جەلىلەردەگى سۋرەتى ارقىلى نازار اۋدارعان. جۇرگىزۋشى جۇمىس اراسىنداعى سپورتتىق جاتتىعۋ قالانىڭ شۋىنان سەرگۋگە جانە جولاۋشىلارمەن قارىم-قاتىناستى جاقسارتۋعا كومەكتەسەتىنىن ايتادى.

بەلتەمىرگە تارتىلۋ – اسحات يبرايەۆتىڭ بالا كەزىنەن كەلە جاتقان ادەتى. "تارتىلسام، تەزىرەك وسەمىن دەپ ويلايتىنمىن"، - دەيدى جۇرگىزۋشى.

ەر جەتكەندە سپورتتىق قۇرالداردى ۇيىنە ورناتىپ الادى. ءبىر ورىندا ۇزاق وتىرعاننان ارقا اۋرۋى پايدا بولاتىنى راس. ال تروللەيبۋستىڭ رولىندە كەشكە دەيىن وتىرۋعا تۋرا كەلەدى.

سوندىقتان ول ۇستاعىش تۇتقالاردى پايدالانىپ، ءتۇرلى جاتتىعۋلار جاساۋدى ادەتكە اينالدىرىپتى. 

اسحات يبرايەۆ، تروللەيبۋس جۇرگىزۋشىسى: – دەنى ساۋدىڭ – جانى ساۋ. جاستار ءقازىر تەلەفون مەن كومپيۋتەردەن اجىرامايدى. ارينە، ەلەكتروندى عاسىر بولىپ تۇر عوي. دەگەنمەن قيمىل-قوزعالىس كەرەك.

سپورت – اسحات يبرايەۆتىڭ ءبىر قىرى عانا. ول بوس ۋاقىتىندا سۋرەت سالىپ، اڭشىلىق قۇرالداردى جاسايدى. ونىسىن ارنايى ساتپايدى. كوڭىلى قۇلاعان ادامدار الادى ەكەن.