ورالدىق انەل سىتدىقوۆا انتاركتيدانى ءجۇزىپ ءوتتى.
قازاقتىڭ قايسار قىزى تەمپەراتۋراسى -1،5 گرادۋس بولاتىن مۇزداي سۋدا 750 مەتردى نەبارى 18 مينۋتتا ەڭسەرگەن. انەلدىڭ كاسىبي سپورتپەن شۇعىلدانعانىنا نەبارى 10 جىل بولعان.
انەل سىتدىقوۆا بۇگىندە انگليانىڭ وكسفورد قالاسىندا تۇرادى. جاڭا جىلدى اركەز تۋعان جەرى ورالدا قارسى الۋدى داستۇرگە اينالدىرعان. بيىل انەلدى اۋەجايدا اتا-اناسى عانا ەمەس، ونداعان سپورت جانكۇيەرلەرى كۇتىپ الدى. وعان باستى سەبەپ – 46 جاستاعى قايسار قىزدىڭ جۋىردا انتاركتيدادا 750 مەتردى ءجۇزىپ ءوتۋى.
قايمەن ەسەندياروۆ، سپورت ارداگەرى:
- لا-مانش، 20 كوپىر جانە كاتالينا بۇعازىن ءجۇزىپ وتكەن ادامدارعا الەمنىڭ 3 ءتاج حانشايىمى اتاعى بەرىلەدى. سول كلۋبقا انەل قارىنداسىمىز ەندى. ونىمەن ءارى قاراي سپورتتىق دەڭگەيىن جالعاستىرىپ، كۇنى كەشە قاراشا ايىندا انتاركتيدادا 13 ەڭ مىقتى ايەل-ەرلەر قاتىسقان مارافونعا قاتىسىپ، تەك قازاق ەمەس، الەمنىڭ ەڭ مىقتىلاردىڭ ءبىرى دەپ ەسەپتەۋگە بولادى.
انەل سىتدىقوۆا باتىس قازاقستان وبلىسىنىڭ تاسقالا اۋدانى اتامەكەن اۋىلىندا دۇنيەگە كەلىپتى. اكەسىنىڭ سوزىنشە، بالا كەزدەن وجەت بوپ وسكەن. سپورتپەن شىنداپ شۇعىلدانۋدى دا 35 جاسىندا عانا باستاپتى. اشىق سۋدا جۇزگەنىنە 10 جىل بولسا، قىسقى جۇزۋمەن اينالىسقانىنا تەك 5 جىل ەكەن.
الىبەك سىتدىقوۆ، انەلدىڭ اكەسى:
- كەشە سولتۇستىك يرلاندياعا، وندا سۋ 10 گرادۋس، سوعان 3 رەت دايىندالىپ، ەكى رەت وتە الماي قالدى. وندا 34 شاقىرىم. بىلاي ايتقاندا، 20 ساعاتتاي ءجۇزۋ كەرەك. ءبىراق سۋ 10 گرادۋس. مەن قانشا ايتتىم: «قويساڭشى، نەتسەيشى، بالالارىڭ بار»، - دەپ. «جوق، تاعى كورەم»، - دەيدى. ەندى تاعى دا ءۇشىنشى رەت بولار.
انەل سىتدىقوۆا – ترياتلوننان قازاقستاننىڭ تۇڭعىش تەمىر حانشايىمى. 2019 جىلى انگليا مەن فرانسيا اراسىنداعى 34 شاقىرىمدىق لا-مانش بۇعازىن 15 ساعاتتا گيدروكوستيۋمسىز ءجۇزىپ وتسە، 22 جىلى مانحەتتەن كوپىرلەرىن اينالىپ، 48 شاقىرىمدى ارتقا تاستاعان. سول جىلى 34 شاقىرىمدىق كاتالينا بۇعازىن باعىندىرعان.
انەل سىتدىقوۆا، جۇزگىش-مارافونشى:
- سالقىن سۋدا ءجۇزۋ قيىن. قيىن عانا ەمەس ءقاۋىپتى، ەگەر تاجىريبەڭ بولماسا. ويتكەنى مۇحيتتا ءتۇن ىشىندە نەبىر جىرتقىش بالىقتار قاسىڭنان ءوتىپ جاتادى. سەزىپ بارا جاتاسىڭ. تولقىندار قانداي؟ ايسبەرگتەر كەزدەسەدى. مۇزداي سۋدا اياق قولىڭ قۇرىسىپ تا قالۋى مۇمكىن. ءبىراق قىستا سۋعا تۇسكەننەن كەيىن مىقتى كۇش، ەنەرگيا سەزىنەسىڭ. مەن بالا كەزدە باسسەينگە بارمادىم. جۇزۋمەن سوڭعى كەزدە عانا شىنداپ شۇعىلداندىم. انگليادا اشىق سۋدا جىل بويى جۇزۋگە مۇمكىندىك مول.
انەل تۋعان جەرىندە دە شىنىعۋىن توقتاتپادى. ءۇش كۇن بويى قالالىق ساياباققا كەلىپ، اق قار، كوك مۇزدا شاعانعا شومىلدى. ءۇش بالانىڭ اناسى ءارى قازاقتىڭ قايسار قىزى كەلەشەكتە سولتۇستىك ءپوليۋستى باعىندىرۋدى جوسپارلاپ قويعان.