قورعانىس ءمينيسترى 23 قاڭتاردا وسكەمەن گارنيزونىنا قاراستى اسكەري بولىمدەردىڭ بىرىندە بولعان قايعىلى جاعدايعا قاتىستى بىرنەشە ادامدى قىزمەتىنەن بوساتتى، - دەپ حابارلايدى aqshamnews.kz ءتىلشىسى.
"بارلىق وقيعا بويىنشا ناقتى كادرلىق جانە تارتىپتىك شەشىمدەر قابىلداندى. "شىعىس" وڭىرلىك قولباسشىلىعىنىڭ قولباسشىسى، شتاب باستىعى جانە قولباسشىنىڭ تاربيە جانە يدەولوگيالىق جۇمىس جونىندەگى ورىنباسارى تارتىپتىك جاۋاپكەرشىلىككە تارتىلدى. اسكەري قىزمەتشى قازا تاپقان اسكەري ءبولىمنىڭ كومانديرى، ونىڭ ورىنباسارى، سونداي-اق باتالون كومانديرى اتقارىپ وتىرعان لاۋازىمدارىنان بوسادى"، - دەپ حابارلانعان قورعانىس مينيسترلىگىنىڭ رەسمي مالىمدەمەسىندە.
ايتا كەتەيىك، قورعانىس مينيسترلىگى بۇل مالىمدەمەسىندە سونداي-اق وسىنداي وقىس جاعدايلاردىڭ الدىن الۋعا باعىتتالعان التى شاراسى تۋرالى ايتقان ەدى.