ەلوردادا «ءاتج» جاق (ءازىربايجان) جانە ءىرى وتاندىق ەكسپورتتاۋشىلاردىڭ قاتىسۋىمەن «قتج» ۇك» اق-نىڭ ۇيىمداستىرعان حالىقارالىق دوڭگەلەك ۇستەل ءوتتى.
ءىس-شارادا وتاندىق ەكسپورتتاۋشىلاردىڭ جۇكتەرىن الەمدىك نارىقتارعا بارىنشا جىلدام جانە ەكونوميكالىق تۇرعىدا ءتيىمدى جەتكىزۋگە مۇمكىندىك بەرەتىن ترانسكاسپيي حالىقارالىق كولىك باعدارىنىڭ (تحكب) ارتىقشىلىقتارى مەن مۇمكىندىكتەرى تالقىلاندى، دەپ حابارلايدى Almaty-akshamy.kz
دوڭگەلەك ۇستەلگە قاتىسۋشىلار – قازاقستاندىق بيزنەستى، ەكسپورتتاۋشىلاردى (تاۋ-كەن ءوندىرۋ، مۇناي-حيميا، اگرارلىق جانە باسقا دا ونىمدەر) تانىستىردى، ءىرى جۇك جونەلتۋشىلەر ءوز سۇراقتارىن تىكەلەي قويا الدى، ۇسىنىستار ەنگىزدى جانە جۇك تاسىمالدارىن ۇيىمداستىرۋداعى ءوزارا ءىس-قيمىلدىڭ، تحكب بويىنشا تاسىمالداردى دامىتۋدىڭ نەگىزگى ماسەلەلەرىن تالقىلاي الدى.
جالپى، ءىس - شارانىڭ كۇن ءتارتىبى اۋقىمدى بولدى – جۇك تاريفتەرى مەن نومەنكلاتۋرالارىنان باسقا، كەدەندىك رەسىمدەۋ، كەمە پارتيالارى، سپوتتىق نارىقتار، بيرجالىق باعا بەلگىلەۋلەر، ەكسپورتتاۋشىلاردىڭ ءونىمدى تاسىمالداۋعا جۇمسايتىن شىعىندارىن ازايتۋ جانە باسقا دا ماسەلەلەر قوزعالدى. ءسوز سويلەگەندەر كەدەندىك راسىمدەردى جەتىلدىرۋ، كولىك-لوگيستيكالىق سەكتوردى جاڭعىرتۋ، حالىقارالىق دالىزدە كولىك قىزمەتتەرىن سيفرلاندىرۋ، لوگيستيكالىق ساياساتتى قالىپتاستىرۋ جانە ىسكە اسىرۋ تۋرالى ايتتى.
ەكسپورتتاۋشىلار قتج-نىڭ وتاندىق وندىرۋشىلەردى قولداۋ بويىنشا جۇرگىزىپ جاتقان ساياساتىنىڭ ارقاسىندا كوپتەگەن كاسىپورىندار ءوز ونىمدەرىن الىس قاشىقتىققا جەتكىزە باستاعانىن اتاپ ءوتتى. ول ءۇشىن قتج تحكب-نىڭ «جۇمساق جانە قاتتى ينفراقۇرىلىمىن» دامىتۋ، قازاقستان اۋماعىندا دا، ەلدەن تىس جەرلەردە دە لوگيستيكالىق قىزمەتتەر سەرۆيسىن ارتتىرۋ بويىنشا جۇمىستاردى بەلسەندى جۇرگىزەدى.
«تحكب بويىنشا 2023 جىلى جۇكتەردى تاسىمالداۋ 2،8 ملن توننانى قۇراپ، 2022 جىلمەن سالىستىرعاندا 86% ءوستى (ءوسىم 1،5 ملن توننا). بۇگىنگى تاڭدا باعدار باسەكەگە قابىلەتتى جەتكىزۋ مەرزىمىن ۇسىنادى – ورتاشا ەسەپپەن 12 كۇن. ورتا مەرزىمدى پەرسپەكتيۆادا ءبىز ءدالىز بويىنشا جۇك تاسىمالداۋ كولەمىن 10 ملن. تونناعا دەيىن جەتكىزۋگە مۇددەلىمىز»، - دەپ اتاپ ءوتتى «قتج» ۇك» اق باسقارما ءتوراعاسىنىڭ لوگيستيكا جونىندەگى ورىنباسارى ەرلان قويشىبايەۆ.
جۇك جونەلتۋشىلەر، ەكسپورتتاۋشىلار جۇمىستا وڭ ناتيجەلەرگە قول جەتكىزۋ ءۇشىن ءوز سۇراقتارى مەن ۇسىنىستارىن ايتتى.
سونىمەن قاتار، ءازىربايجان تەمىرجولشىلارىنىڭ قازاقستانعا ساپارى اياسىندا «قتج» ۇك» اق وكىلدەرىمەن، قازاقستاندىق ەكسپورتتاۋشىلارمەن، لوگيستيكالىق كومپانيالارمەن جانە جۇك جونەلتۋشىلەرمەن ءبىرقاتار جۇمىس كەزدەسۋلەرى مەن كەلىسسوزدەر بولىپ ءوتتى.