توتەنشە جاعداي، دۇلەي ءزىلزالا نەمەسە ونەركاسىپتىك اپات بولعان جاعدايلاردا ۆاحتالىق جۇمىستىڭ مەرزىمى ۇزارادى.
ءماجىلىستىڭ قاراۋىنا ەنگىزىلگەن «ق ر كەيبىر زاڭنامالىق اكتىلەرىنە الەۋمەتتىك قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا وسىلاي جازىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
«توتەنشە نەمەسە سوعىس جاعدايى ەنگىزىلگەن، دۇلەي ءزىلزالانىڭ نەمەسە وندىرىستىك اپاتتىڭ الدىن الۋ نە ولاردىڭ زارداپتارىن دەرەۋ جويۋ ءۇشىن نە مەملەكەتتىك ورگانداردىڭ نەمەسە ولاردىڭ لاۋازىمدى ادامدارىنىڭ شەشىمى بويىنشا كارانتيندى ەنگىزۋ كەزىندە، سونداي-اق جۇمىسكەرلەردىڭ ءومىرى نەمەسە دەنساۋلىعىنا قاتەر توندىرەتىن باسقا دا ەرەكشە جاعدايلاردا جۇمىس بەرۋشى جۇمىس ۋاقىتىنىڭ بەلگىلەنگەن ۇزاقتىعىن ساقتاي وتىرىپ، جوعارىدا كورسەتىلگەن جاعدايلار جويىلعانعا دەيىن ۆاحتانىڭ ۇزاقتىعىن ارتتىرۋعا قۇقىلى»، - دەپ جازىلعان جاڭا رەداكسيادا.
ەڭبەك جانە حالىقتى الەۋمەتتىك قورعاۋ مينيسترلىگىنىڭ تۇسىندىرمە قۇجاتىندا مۇنداي باستاما ۇزدىكسىز قىزمەت ەتەتىن ءوندىرىس، سەح جانە ۋچاسكەلەردەگى جۇمىستى تولىق قامتاماسىز ەتۋ ماقساتىندا ەنگىزىلگەنى ايتىلعان. دەگەنمەن بۇل ورايدا قىزمەتكەردىڭ جۇمىس كەستەسى مەن تىنىعۋ ۋاقىتى ساقتالادى.
سونىمەن قاتار اتالعان زاڭ نەگىزىندە ق ر ەڭبەك كودەكسىنە وزگەرىس ەنگىزۋ ۇسىنىلدى. وعان ساي، ەندى ۋاقىتشا ەڭبەككە جارامسىزدىعى بويىنشا 1 ايعا تولەنەتىن الەۋمەتتىك جاردەماقى 15 اەك-تەن (51 750 تەڭگەدەن) 25 اەك-كە (86 250 تەڭگەگە) دەيىن ۇلعايماق.