بۇگىن قالالىق سۋبۇرقاقتارعا ارنالعان پرەسس-تۋر ءوتتى. قالاداعى تاريحي ماڭىزعا يە سۋبۇرقاقتارعا جاسالعان پرەسس-تۋردى الماتى قالاسى قوعامدىق كەڭىستىكتەردى دامىتۋ باسقارماسىنىڭ ۇيىمداستىرعان بولاتىن.
وندا ب ا ق وكىلدەرى العاش رەت جەر استىنداعى تەحنيكالىق بولمەلەردى ارالاپ، ەسكى ينفراقۇرىلىممەن جانە جوسپارلانعان جوندەۋ جوبالارىمەن تانىستى.
كوممۋنالدىق مەنشىكتەگى ءتورت ءىرى سۋبۇرقاق – شىعىس جانە باتىس سۋبۇرقاقتارى، رەسپۋبليكا الاڭىنداعى باستى سۋبۇرقاق جانە ع.مۇسىرەپوۆ اتىنداعى بالالار مەن جاسوسپىرىمدەر تەاترى الدىنداعى سۋبۇرقاق تا بيىل العاش رەت كەشەندى رەكونسترۋكسيادان وتەدى.
قالالىق قوعامدىق كەڭىستىكتەردى دامىتۋ باسقارماسى باسشىسىنىڭ ورىنباسارى باتىرحان سۇلەيمەنوۆتىڭ ايتۋىنشا، جوبانىڭ باستاپقى قۇنى 8 ملرد تەڭگەنى قۇراسا، كەيىننەن الماتى قالاسىنىڭ اكىمى ەربولات دوسايەۆتىڭ تاپسىرماسىمەن شىعىندار وڭتايلاندىرىلىپ، سوما 6 ملرد تەڭگەگە دەيىن قىسقارتىلعان. مەملەكەتتىك ساتىپ الۋ ناتيجەسى بويىنشا كەلىسىمشارت 5،130 ملرد تەڭگەگە جاسالىپ، ۇنەم 3 ملرد تەڭگەنى قۇرادى.
– قۇرىلىس شىعىندارىنىڭ 65-70 پايىزى قۇرىلىس-مونتاج جۇمىستارى مەن زاماناۋي ەۋروپالىق جابدىقتارعا جۇمسالادى. سۋبۇرقاقتار ءۇشىن يسپاندىق Fluidra كومپانياسىنىڭ، سونداي-اق گەرمانيا مەن يتاليادا وندىرىلگەن ساپالى قۇرىلعىلار قولدانىلادى. جابدىققا 5 جىلدىق كەپىلدىك پەن 3 جىل تەحنيكالىق قىزمەت كورسەتۋ قاراستىرىلعان، ال قىزمەت ەتۋ مەرزىمى – 15 جىل»، — دەدى باتىرحان ايبات ۇلى.
جوندەۋ جۇمىستارى بارىسىندا گيدرووقشاۋلاۋدى جاڭارتۋ، ينجەنەرلىك جەلىلەردى اۋىستىرۋ، اۆتوماتتاندىرىلعان باسقارۋ جۇيەسىن ەنگىزۋ، جارىقتاندىرۋ، سورعى جانە ءسۇزۋ جۇيەلەرىن تولىقتاي جاڭعىرتۋ جوسپارلانعان. سۋبۇرقاقتارداعى سۋ تازارتۋ پروسەسى حلوردىڭ ورنىنا بەلسەندى وتتەگى گەنەراتورى ارقىلى جۇرگىزىلەتىن بولادى.
سۋبۇرقاقتاردىڭ تاريحي جانە ساۋلەتتىك ەرەكشەلىكتەرىن ساقتاۋ جوبانىڭ باستى باسىمدىعى. گرانيت پليتالارى مەن تابيعي تاستار بۇرىنعى قالپىندا قالدىرىلىپ، ەستەتيكالىق بەينەسى ساقتالادى.
تەحنيكالىق قىزمەت كورسەتۋدى جۇزەگە اسىراتىن «ەكو الماتى» ج ش س ديرەكتورىنىڭ ورىنباسارى رۇستەم مۇحامەتجانوۆ قازىرگى تاڭدا قالالىق 66 سۋبۇرقاققا قىزمەت كورسەتىلەتىنىن اتاپ ءوتتى.
«ءبىز سۋبۇرقاقتاردىڭ سانيتارلىق جاعدايىن، تەحنيكالىق جۇيەلەرىن، سۋ تازالاۋ جانە كونسەرۆاسيالاۋ جۇمىستارىن جۇرگىزەمىز. قازىرگى تاڭدا 45 قىزمەتكەر، سونىڭ ىشىندە 8 ەلەكتريك، 7 سانتەحنيك پەن دانەكەرلەۋشى جۇمىس ىستەيدى. جوندەۋ اياقتالعاننان كەيىن دە ءبىز قىزمەت كورسەتۋدى جالعاستىرامىز»، — دەدى ول.
جوبا ينجەنەرلىك ينفراقۇرىلىمدى جاڭارتىپ قانا قويماي، تاريحي كەلبەتتى ساقتاۋعا دا باسىمدىق بەرەدى. جاڭارتۋ جۇمىستارى ءساۋىر ايىندا باستالىپ، قازان ايىندا – الماتى كۇنىنە دەيىن اياقتالادى دەپ جوسپارلانۋدا. وسىلايشا جاڭارتىلعان سۋبۇرقاقتار الماتى تۇرعىندارى مەن قوناقتارى ءۇشىن زاماناۋي دەمالىس ورنىنا اينالادى.
«اقشامنىڭ» انىقتاماسى:
قايتا جاڭعىرتىلىپ جاتقان سۋبۇرقاقتاردىڭ بارلىعى دا الماتى قالاسىنىڭ ماڭىزدى ساۋلەتتىك نىساندارىنىڭ قۇرامداس بولىگى بولىپ تابىلادى. شىعىس جانە باتىس سۋبۇرقاقتارى مەن رەسپۋبليكا الاڭىنداعى سۋبۇرقاقتار 1979 جىلى، ال ع.مۇسىرەپوۆ اتىنداعى تەاتر الدىنداعى سۋبۇرقاق 1962 جىلى سالىنعان. بۇعان دەيىن ولارعا تەك كوسمەتيكالىق جوندەۋلەر جۇرگىزىلگەن.
