ءتورت پايىزدىق اۆتونەسيە العانداردىڭ ءتىزىمى جاريالانا ما؟

بۇل سۇراققا يندۋستريا جانە ينفراقۇرىلىمدىق دامۋ ءمينيسترى مارات قارابايەۆ جاۋاپ بەردى.

ءمينيستردىڭ ايتۋىنشا، اۆتونەسيە العان ادامداردىڭ ءتىزىمىن وزدەرى رۇقسات بەرگەندە عانا جاريالاۋعا بولادى، دەپ حابارلايدى Almaty-akshamy.kz

بىلتىر 4 پايىزدىق اۆتونەسيە باعدارلاماسىنا 100 ميلليارد تەڭگە بولىنگەن بولاتىن. وسى اقشانىڭ ەسەبىنەن 12 مىڭعا جۋىق ادام كولىكتى نەسيەگە راسىمدەدى. ولار اي سايىن بانكتەرگە تولەم جاساپ وتىرادى. وسىلايشا تاعى 7،6 ميلليارد تەڭگە جينالدى. ونى كۇنى كەشە autonesie.kz پورتالى ارقىلى تاعى 761 ادامعا ۇلەستىردى.

ءمينيستردىڭ ايتۋىنشا، بارلىق ادامنىڭ ءتىزىمىن جاريالاۋعا بولادى. ءبىراق ول ازاماتتاردىڭ كەلىسىمى كەرەك.

"باعدارلاماعا قاتىساتىنداردىڭ ءتىزىمىن ءوزىمىز جاريالاي المايمىز. سەبەبى بۇنىڭ بارلىعى – جەكە مالىمەت. ال ول ادامداردىڭ كەلىسىمى بولسا، ءتىزىمدى جاريالاۋعا بولادى"، - دەدى قارابايەۆ.

ونىڭ سوزىنە قاراعاندا، باستاپقىدا اۆتونەسيە جۇيەسىنىڭ اشىقتىعىنا قاتىستى سەنىمسىزدىك بولعان. سوندىقتان ادام فاكتورىن بولدىرماۋ ءۇشىن سيفرلىق پلاتفورما ىسكە قوسىلدى. ەندى ريەۆولۆەرلىك تارتىپپەن جينالاتىن اۆتوكرەديتتىڭ اقشاسى پورتال ارقىلى عانا ۇلەستىرىلەدى.

ايتا كەتەرى، كەلەسى ايدا autonesie.kz سايتىندا تاعى ءوتىنىم قابىلدانادى. ءبىراق ول كەزدە 100-دەن استام ادام عانا الادى. سەبەبى ءبىر ايدىڭ ىشىندە 1 ميلليارد تەڭگەدەن استام قارجى جينالادى.