قازاقستان قۇراماسىنىڭ كاپيتانى اسلانبەك شىمبەرگەنوۆتىڭ جارتىلاي فينالدىق كەزدەسۋىندە تورەشىلەردىڭ شەشىمىنە قاتىستى قازاقستان بوكس فەدەراسياسىنىڭ پەرەزيدەنتى كەڭەس راقىشيەۆ مالىمدەمە جاسادى، دەپ حابارلايدى almaty-akshamy.kz
قۇرمەتتى جانكۇيەرلەر، الەم چەمپيونى، قازاقستان قۇراماسىنىڭ كاپيتانى اسلانبەك شىمبەرگەنوۆتىڭ جارتىلاي فينالدىق كەزدەسۋىندە تورەشىلەردىڭ اسا ادىلەتسىز شەشىمىنە قاتىستى ورەسكەل وقيعا ورىن الدى. شىمبەرگەنوۆ بۇكىل جەكپە-جەك بويى جاپونيالىق سيەۆون وكازاۆانى سوققىنىڭ استىنا الدى.
جۇدىرىقتارى قارسىلاسقا ءدال ءتيىپ جاتتى. بارلىق جاعىنان مىقتىراق ءارى باسىمىراق بولدى. ءبىراق ولار شىمبەرگەنوۆتىڭ قارسىلاسىنىڭ قولىن كوتەردى...
حالىقارالىق وليمپيادا كوميتەتى IBA-داعى تورەشىلىككە قاتىستى ءاردايىم شاعىم ءبىلدىرىپ كەلگەن ەدى، ءبىراق حانچجوۋداعى ازيا ويىندارىنىڭ جارتىلاي فينالىندا بولعان وقيعا تىم شەكتەن شىعىپ كەتتى.
وسىعان بايلانىستى قازاقستان بوكس فەدەراسياسى ازيا ويىندارى بويىنشا حوك تورەشىسىنە ءوز تالاپتارىن رەسمي تۇردە بىلدىرەدى. بۇل رەتتە ءتۋرنيردىڭ ەڭ مىقتى بوكسشىلارى ءبىزدىڭ بىلعارى قولعاپ شەبەرلەرىمەن بىردەي جەرەبەگە ءتۇسۋى، جالپى جەرەبەنىڭ وتكىزىلۋ رەتى، تورەشىلەردىڭ جۇمىسىنا سۇراقتار تۋىنداتتى. ال جەرگىلىكتى بوكسشىلارعا «قىزىل كىلەم» توسەلدى...
حوك قامقورلىعىنداعى تۋرنيرلەردە تورەشىلەر شەشىمىنە نارازىلىقتار مەن شاعىمداردى بەرۋگە بولمايدى. قازاقستان - بوكس دەرجاۆاسى، بوكستىڭ كوشباسشىسى رەتىندە رينگتەگى مۇنداي ادىلەتسىزدىك فاكتىلەرىمەن كەلىسە المايدى.
مەن ءوز تاراپىمنان اسلانبەك شىمبەرگەنوۆكە جەكە قولداۋ بىلدىرەمىن! مۇنداي فاكتىلەر كاپيتانىمىزدى سىندىرمايدى، ەڭسەسىن تۇسىرمەيدى دەپ سەنەمىن، جانە ول بوكستان ەڭ ماڭىزدى حالىقارالىق تۋرنيرلەردە قازاقستان تۋىن بيىكتە جەلبىرەتەدى دەپ ويلايمىن!
قۇرمەتپەن، قبف پرەزيدەنتى كەڭەس راقىشيەۆ!