الماتىداعى ءىلياس ەسەنبەرلين اتىنداعى №25 گيمنازيادا ءار جىلدارى تانىمال ساياسي قايراتكەرلەر، عالىمدار، ونەر ادامدارى وقىعان.
اتالعان مەكتەپتىڭ ەڭ تانىمال تۇلەگى – قازاقستان پرەزيدەنتى قاسىم-جومارت توقايەۆ.
«جۇلدىزدى» مەكتەپ
90 جىلعا جۋىق تاريحى بار №25 گيمنازيا العاشىندا پۋشكين كوشەسىندەگى 73-ۇيدە اشىلعان. باستاپقىدا مۇندا تەك ءتورت سىنىپ بولعان. 1937 جىلى تولىق ورتا مەكتەپكە ارنالعان جاڭا عيمارات سالىنىپ، 1962 جىلى جانىنان تاعى عيمارات بوي كوتەرگەن. 2004 جىلدىڭ اقپانىندا قازاقستان ۇكىمەتىنىڭ شەشىمىمەن مەكتەپكە جازۋشى ءىلياس ەسەنبەرليننىڭ اتى بەرىلگەن.
№25 گيمنازيادا ءبىلىم العان اتاقتى تۇلەكتەر اراسىندا: قازاقستان پرەزيدەنتى قاسىم-جومارت توقايەۆ، ساياساتكەر ۆلاديمير جيرينوۆسكيي، تاريحشى ءارى جۋرناليست يوسيف ماليار، ارحەولوگ كەمەل اقىشيەۆ، ونەرتانۋشى اناتوليي كەلبەرگ، كينورەجيسسەر ۆاديم ءابدىراشيتوۆ، ا-ستۋديو توبىنىڭ باس-گيتاريسى ۆلاديمير ميكلوشيچ، قازاقستاننىڭ فرانسياداعى ەلشىسى جان گالييەۆ، رەجيسسەر يۋريي پيسكۋنوۆ، كومپوزيتور ءالىم زايىروۆ، ا-ستۋديو توبىنىڭ ءانشىسى باعلان ءسادۋاقاسوۆ، ساياساتكەر داۋلەت سەمبايەۆ، نەيروحيرۋرگ يۋريي انوشين، عالىم اباي بايگەنجيندەر بار.
بولاشاققا جازىلعان حات
ءبىلىم وشاعىنىڭ 2006 جىلدان بەرگى باسشىسى عازيزا امانبايدىڭ ايتۋىنشا، بولاشاققا حات جازىپ، ونى ۋاقىت كاپسۋلاسىنا سالۋ گيمنازياداعى باستى ءداستۇر ەكەن. بۇل ءداستۇر 1970 جىلدان باستالىپتى. 2003 جىلى قازاقستاننىڭ سىرتقى ىستەر ءمينيسترى قىزمەتىندە بولعان قاسىم-جومارت توقايەۆ مەكتەپكە كەلىپ، سول قىزىقتى ءداستۇردى ەسكە العان. ءبىراق ول كۋبوك تەك ءبىر جىلدان كەيىن تابىلعان.
«2003 جىلى مەكتەپكە تۇلەك رەتىندە كەلگەن توقايەۆ ۆەستيبيۋلگە كىرە سالا «وسى ءبىر تۇسقا ءبىز كۋبوكتى جاسىرعان ەدىك» دەدى. ءبىز ول جولى ەشتەڭە تۇسىنبەدىك. 2004 جىلى ۆەستيبيۋلدى رەكونسترۋكسيالاۋ كەزىندە قۇرىلىسشىلار قابىرعادان جادىگەردى تاۋىپ الدى. ونىڭ بەتى تاقتايمەن جابىلعان، ىشىندە وسى كۋبوك جاتتى. ءبىز ونى اشىپ كوردىك. ونىڭ ىشىندە كومسومولشىلاردىڭ حاتى جاتتى. 1970 جىلعا العاشقى حاتتى 1964 جىلعى تۇلەكتەر جازعان. سول شاقتا الاۋ الىپ جۇرەتىن شەرۋ جۇرگەن. سوندا كومسومولشىلار ەكى بەتتىك پاراققا ريەۆوليۋسيانىڭ ءجۇز جىلدىعىنا ارناپ 2017 جىلدىڭ تۇلەكتەرىنە حات ارناعان»، - دەدى ديرەكتور.
كاپسۋلانى ءتورت كومسومولشى بەكىتكەن. ولاردىڭ قاتارىندا مەملەكەت باسشىسى قاسىم-جومارت توقايەۆ تا بولعان.
2005 جىلى گيمنازيا 40 جىل بۇرىنعى باستامانى جالعاستىرىپ، وقۋشىلار مەن ۇستازدار 2030 جىلعا ارناپ حات جازدى جانە ءوز ۋاقىت كاپسۋلالارىن قابىرعاعا بەكىتتى. ال 2021 جىلى مەكتەپتە بولعان قاسىم-جومارت توقايەۆ 2050 جىلى اشىلۋى ءتيىستى ۋاقىت كاپسۋلاسىن ورنالاستىرۋعا قاتىسقان.
شاكىرت توقايەۆ
«پرەزيدەنت وقىعان كابينەتتى دە انىقتاپ الدىق. ول كابينەتتى كوردى. سول جىلدارى ءار سىنىپ ءوز كابينەتىندە وتىرعان. سوندىقتان 10 "ۆ" سىنىبىنىڭ كابينەتىن تاپتىق. ءۇشىنشى قاتاردىڭ ءۇشىنشى پارتاسىندا توقايەۆ وتىرعان. ورىس ءتىلى جانە ادەبيەتى ءپانىنىڭ ءمۇعالىمى اننا بوريسوۆنا يگدال پرەزيدەنتتىڭ سىنىپ جەتەكشىسى بولعان. ماعان ول كىسىمەن بىرنەشە جىل جۇمىس ىستەۋ بۇيىردى»، - دەدى عازيزا امانباي.
بولاشاق پرەزيدەنتكە تاريحتان ساباق بەرگەن، توقايەۆتىڭ سۇيىكتى ۇستازى – سەرافيما فيلاتوۆنا نيكونوۆا 92 جاسىندا ومىردەن وتكەن.
ءبىلىم العان ۇياسىن ءاردايىم ۇلىقتاپ جۇرەتىن شاكىرت توقايەۆ مەكتەپ كىتاپحاناسىنا ءتۇرلى جانرداعى كىتاپتار سىيلاپتى.
توقايەۆ گيمنازيادا ءالى كۇنگە دەيىن فرانسۋز ءتىلىن تەرەڭدەتىپ وقىتاتىنىن، فرانسيا ەلشىلىگىمەن، فرانسۋز اليانسىمەن تىعىز بايلانىس بار ەكەنىن، حالىقارالىق دەڭگەيدە وقۋشىلارمەن الماسۋ جۇرگىزىلىپ جاتقانىن ەرەكشە اتاپ ءوتتى. پرەزيدەنت بۇل جاعدايدى جوعارى باعالاپ، وسى داستۇرلەردى جانە بايلانىستى ساقتاۋ قاجەت ەكەنىن ايتتى.
مەكتەپ مۋزەيى
بۇل ءبىلىم وشاعىنىڭ تاعى ءبىر ەرەكشەلىگى – مەكتەپتەگى مۋزەي. مۋزەيگە دە مەكتەپتىڭ اتى سەكىلدى ءىلياس ەسەنبەرليننىڭ ەسىمى بەرىلگەن.
ونىڭ ۇلى دا وسى مەكتەپتى ءبىتىرىپ، اكەسىنىڭ ۇستەلىن، باسپا ماشيناسى مەن كىتاپتارى سەكىلدى جەكە زاتتارىن مۋزەي قورىنا تابىستاعان.
مۇندا حاتتار مەن قۇرمەت تاقتالارىنان بولەك، سوعىس جىلدارىنان بەرى مەكتەپتى باسقارعان ديرەكتورلاردىڭ ءاتى-جونى جازىلعان ءۇي كىتاپشاسى بار.
مۋزەيدەگى قۇرمەتتى قوناقتار كىتابىنا مەملەكەت باسشىسى دا جازبا قالدىرعان.
مۋزەيدە گيمنازيانىڭ ءاربىر اتاقتى تۇلەگىنە ارناپ جەكە بۇرىش دايىنداۋ جوسپارلانعان. مەكتەپ اكىمشىلىگى مەملەكەتتىك ارحيۆتەن ەسكى سۋرەت تاۋىپ العان. №25 مەكتەپ سول جىلدارى ارحيۆكە قۇجات تاپسىراتىن جالعىز مەكتەپ بولىپتى.