«زاڭ» مەديا-كورپوراسياسى» ج ش س كەمەل توقايەۆ اتىنداعى دەتەكتيۆ شىعارمالار بايقاۋىن 2018 جىلدان بەرى ۇيىمداستىرىپ كەلەدى. بۇگىنگە دەيىن بەس رەت وتكەن بايقاۋ كوپشىلىككە جاقسى تانىمال.
وسى دودانىڭ ارقاسىندا تالاي قالامى قارىمى جازۋشى، جۋرناليستەر، زاڭگەر، قۇقىق قورعاۋشىلار دەتەكتيۆ جانرىندا شىعارما جازىپ، بايقاۋدىڭ تارتىستى وتۋىنە ۇلەس قوستى. بۇل شىعارماشىلىق سايىس سونىمەن بىرگە جاس قالامگەرلەردىڭ جاڭا قىرىنان تانىلۋىنا مۇمكىندىك تۋعىزدى. مۇنىڭ ءبارى ادەبيەتتىڭ كەنجەلەپ قالعان جانرىنىڭ تۇرلەنۋىنە، جاندانۋىنا ىقپالىن تيگىزگەنى انىق.
بايقاۋ جۇلدەگەرلەرىنىڭ ۇزدىك شىعارمالارى توپتاستىرىلعان «شىتىرمان» جيناعى كورپوراسيانىڭ 2018 جىلدان بەرگى ەڭبەگىنىڭ جەمىسى، دەتەكتيۆ جانرىنىڭ دامۋىنا قوسىلعان قوماقتى ۇلەس دەسەك قاتەلەسپەيمىز.
ال بيىلعى دەتەكتيۆ شىعارمالاردىڭ التىنشى بايقاۋى جازۋشىنىڭ 100 جىلدىعىمەن تۇسپا-تۇس كەلىپ وتىر. ءارى بيىلعى شاراعا جەتىسۋ وبلىسىنىڭ اكىمدىگى قولداۋ كورسەتكەنىن ايتا كەتكەنىمىز ءجون.
كەمەل توقايەۆتىڭ تۋعان ولكەسىندە وتەتىن بايقاۋدىڭ ارتىقشىلىعى از ەمەس. ۇمىتكەرلەردىڭ بايقاۋ تالابىنا ساي كەلەتىن شىعارمالارى رەسپۋبليكالىق «زاڭ گازەتى» مەن «يۋريديچەسكايا گازەتا» باسىلىمدارىندا جارىق كورەدى.
بايقاۋعا جولدانعان شىعارمالار zanmedia.kz سايتىنداعى دەتەكتيۆ ايدارىندا جيناقتالىپ، كوپشىلىكتىڭ وقىپ تانىسۋىنا، پىكىر بىلدىرۋىنە مۇمكىندىك جاسالادى.
شارا اياسىندا بۇعان دەيىنگى بايقاۋلاردا باس جۇلدەنى يەلەنگەن ۇزدىكتەر تالدىقورعانعا ارنايى شاقىرىلىپ، شەبەرلىك ساباعىن وتكىزەدى.
ەڭ باستىسى، بيىلعى بايقاۋدىڭ جۇلدە قورى دا وسال ەمەس.
جەتىسۋ وبلىسىنىڭ اكىمدىگى كەمەل توقايەۆ اتىنداعى بايقاۋدىڭ جەڭىمپازىنا 1،5 ميلليون تەڭگە جۇلدە تاعايىنداپ وتىر.
ودان بولەك:
1 ءبىرىنشى ورىن يەسى – 1 ملن تەڭگە؛
2 ەكىنشى ورىن يەسى – 750 مىڭ تەڭگەدەن؛
3 ءۇشىنشى ورىن يەسى – 500 مىڭ تەڭگەدەن قارجىلاي سىيلىق الادى.
جاقسى ىستەن جەتىسۋ وبلىسىنىڭ سوت، پروكۋراتۋرا، پوليسيا جانە ادىلەت دەپارتامەنتى دە شەت قالعان جوق. بۇل قۇرىلىم جەتەكشىلەرى دە بايقاۋداعى ۇزدىك شىعارما يەلەرىن ىنتالاندىرۋ ماقساتىندا بىرنەشە سىيلىق تاعايىنداپ وتىر.
بايقاۋ ەرەجەلەرى:
كەمەل توقايەۆ اتىنداعى دەتەكتيۆ شىعارمالار بايقاۋىنا جىبەرىلەتىن شىعارمالار دەتەكتيۆ جانرىنىڭ تابيعاتىنا ساي بولۋى كەرەك؛
ءبىر اۆتور بىرنەشە شىعارماسىن ۇسىنا الادى، ىرىكتەۋ ۇيىمداستىرۋشىلار قۇزىرىنا كىرەدى؛
ءماتىن Microsoft Word رەداكتورىندا تەرىلۋى ءتيىس، ءقارپى – Times New Roman، كەگل — 14، جول ارالىق ينتەرۆال – 1، تۇزەتىلۋى – ەنىنەن، شەت-شەتىنەن – 2 سم.. ۇمىتكەر ءوزىنىڭ ءاتى-جونىن، ءتولقۇجاتىنىڭ كوشىرمەسىن، ۇيالى بايلانىس نومەرىن، ەلەكتروندى پوشتاسىن تولىق جازۋى كەرەك.
شىعارمالار 2023 جىلعى 15 قازان ساع 18.00-گە دەيىن قابىلدانادى؛
بەلگىلەنگەن مەرزىمنەن كەشىگىپ جىبەرىلگەن، كونكۋرستىڭ تالابىنا سايكەس كەلمەيتىن، بۇرىن باسقا بايقاۋعا قاتىسقان، سونداي-اق «انتيپلاگيات» جۇيەسىندە اۆتورلىققا ساراپتامادان وتكىزىلمەگەن شىعارمالاردىڭ كونكۋرسقا قاتىسۋىنا جول بەرىلمەيدى؛
قازاننىڭ 15-25 ارالىعىندا ۇمىتكەرلەر شىعارماسىن قازىلار ىرىكتەيدى؛
بايقاۋ جەڭىمپازدارىن ماراپاتتاۋ 8 قاراشاعا بەلگىلەنگەن.