پرەزيدەنت قاسىم-جومارت توقايەۆ قازاقستاندىقتاردى اباي قۇنانباي ۇلىنىڭ 180 جىلدىق مەرەيتويىمەن قۇتتىقتادى، دەپ حابارلايدى Aqshamnews.kz اقورداعا سىلتەمە جاساپ.
"اباي – ءتول مادەنيەتىمىزدى دامىتۋعا ولشەۋسىز ۇلەس قوسقان الەمدىك دەڭگەيدەگى كەمەڭگەر تۇلعا، حالقىمىزدىڭ سانا-سەزىمىن جاڭعىرتقان ۇلى اقىن. ول جاڭا ادەبيەتىمىزدىڭ نەگىزىن قالاپ، دۇنيەتانىمىمىزدىڭ كوكجيەگىن كەڭەيتتى. وسكەلەڭ ۇرپاقتى ءبىلىمپاز، ەڭبەكقور، ادال ازامات بولۋعا شاقىرىپ، ۇلتتىڭ جاڭا ساپاسىن قالىپتاستىراتىن قاسيەتتەردى كەڭىنەن دارىپتەدى. وتانعا دەگەن سۇيىسپەنشىلىكتىڭ جانە ەل مۇددەسى ءۇشىن قالتقىسىز قىزمەت ەتۋدىڭ وزىق ۇلگىسىن كورسەتتى" دەدى قاسىم-جومارت توقايەۆ.
سونداي-اق ول حاكىم ابايدىڭ مول مۇراسى – قازاق حالقىنىڭ عانا ەمەس، بارشا ادامزاتتىڭ ونەگە الاتىن اسىل قازىناسى ەكەنىن اتاپ ءوتتى.
"ونىڭ وي-تولعامدارى مەن وسيەتتەرىنىڭ وزەكتىلىگى ەشقاشان جوعالمايدى. سوندىقتان ابايدى تانۋ جانە تانىتۋ، شىعارماشىلىعىن تەرەڭ زەردەلەۋ وتە ماڭىزدى. بۇگىنگى سالتاناتتى ءىس-شارانىڭ تۇپكى ءمانى دە – وسىندا" دەدى پرەزيدەنت.
ول شىعىس ءوڭىرىن ابايمەن قاتار شاكارىم قۇدايبەردى ۇلى، مۇحتار اۋەزوۆ سىندى ۇلتتىڭ ۇلى پەرزەنتتەرىن دۇنيەگە اكەلگەن كيەلى ولكە ەكەنىن ەسكە سالدى. مەملەكەت وسى ايماقتى ۇلتتىق قۇندىلىقتار مەكەنى رەتىندە وركەندەتۋگە باسا ءمان بەرەتىنىن دە قوسا كەتتى.
"ۇلى ويشىلدىڭ ومىرشەڭ ولەڭدەرى مەن قاستەرلى قارا سوزدەرى ءالى تالاي ۇرپاققا رۋحاني ازىق بولارى انىق" دەپ اياقتادى ءسوزىن مەملەكەت باسشىسى.