مەملەكەت باسشىسى تۇرىكمەنستان پرەزيدەنتىنە قۇتتىقتاۋ جەدەلحاتىن جولدادى، - دەپ حابارلايدى اqshamnews.kz ءتىلشىسى.
قاسىم-جومارت توقايەۆ سەردار بەردىمۇحامەدوۆ پەن بارشا تۇرىكمەن حالقىن تاۋەلسىزدىك كۇنىمەن قۇتتىقتادى.
پرەزيدەنت جەدەلحاتىندا ەكى ەل اراسىنداعى ىنتىماقتاستىقتىڭ دامۋ قارقىنى جوعارى ەكەنىن اتاپ وتكەن. سونىمەن قاتار، بىرلەسكەن كۇش-جىگەردىڭ ارقاسىندا مازمۇنى بايي تۇسكەن ىقپالداستىقتىڭ ستراتەگيالىق سەرىكتەستىك رۋحىنا جانە قوس حالىقتىڭ مۇددەسىنە تولىق ساي كەلەتىنىنە توقتالعان.
قاسىم-جومارت توقايەۆ سان قىرلى مەملەكەتارالىق بايلانىستى جان-جاقتى نىعايتۋعا بەيىل ەكەنىن راستاپ، سەردار بەردىمۇحامەدوۆتىڭ باۋىرلاس تۇرىكمەن حالقىنىڭ يگىلىگى مەن وسىپ-وركەندەۋى جولىنداعى جاۋاپتى مەملەكەتتىك قىزمەتىنە تابىس تىلەدى.